TŌVĪ-19 ’e te mau hiero

Fa’ahitira’a

Peresideni Russell M. Nelson

Peresideni nō Te ’Ēkālesia a Iesu Mesia i te Feiā Mo’a i te mau Mahana Hope’a nei

I te ’ōmuara’a o te matahiti i ma’iri a’e nei, nō te ma’i pe’e te COVID-19 ’e nō tō tātou hina’aro ’ia riro ’ei mau ta’ata huira’atira maita’i i te ao ato’a, ’ua rave mātou i te fa’aotira’a fifi ’ia ’ōpani i te mau hiero ato’a nō te hō’ē taime. I roto i te mau ’āvae i muri iho, ’ua fa’auruhia mātou ’ia ’īriti marū noa i te mau hiero nā roto i te hō’ē ravera’a pāruru-maita’i-hia. I teienei, tē ’īritihia nei te mau hiero i roto e maha tuha’a, ma te ha’apa’o pāpū i te mau arata’ira’a ’e te mau ture pārurura’a a te fa’aterera’a hau nō te fenua iho […]

Tē māuruuru nei mātou nō tō ’outou fa’a’oroma’i ’e te tāvinira’a ha’apa’o i roto i teie pu’e tau tāuiui ’e te fifi. Tē pure nei au ē ’ia ama māramarama atu ā tō ’outou hina’aro ’ia ha’amori ’e ’ia tāvini i roto i te hiero hau atu i teienei.

Tē uiui nei paha ’outou ē, a hea e ti’a ai ia ’outou ’ia ho’i fa’ahou i te hiero. Pāhonora’a : E ’īritihia tō ’outou hiero ’ia fa’ati’a ana’e te mau fa’aturera’a a te fa’aterera’a hau o te fenua iho […]

’A tīa’i noa ai, ’a tāpe’a noa i tā ’outou mau fafaura’a ’e te mau ha’amaita’ira’a nō te hiero i mua roa i roto i tō ’outou ferurira’a ’e tō ’outou ’ā’au. ’A ha’apa’o noa i te mau fafaura’a tā ’outou i rave.

Tē patu nei tātou i teienei nō a muri a’e ! […]

Tē hina’aro nei mātou e ha’afātata i te fare o te Fatu i pīha’i roa i tō tātou mau melo, ’ia fāri’i ho’i rātou i te ha’amaita’ira’a mo’a o te haerera’a i te hiero ma te pinepine e au i tō rātou huru orara’a […]

’Ua riro te mau hiero ’ei tuha’a faufa’a roa o te fa’aho’ira’ahia mai te ’evanelia a Iesu Mesia i roto i tōna ’īra’a. E fa’a’ī te mau ’ōro’a o te hiero i tō tātou orara’a i te mana ’e te pūai—e ’ore e noa’a nā roto i te tahi atu rāve’a. Tē ha’amāuruuru nei tātou i te Atua nō teie mau ha’amaita’ira’a.