« Te mau ’āparaura’a faufa’a », Nō te Pūai o te Feiā ’Āpī, Mē 2021.
Tuha’a purera’a nō te po’ipo’i sābati
Te mau ’āparaura’a faufa’a
Fa’ahitira’a
E’ita e ti’a ia tātou ’ia tīa’i ’ia tupu noa mai te fa’afāriura’a nō tā tātou mau tamari’i. E’ita te fa’afāriura’a ’ōpua-’ore-hia i te parau tumu nō te ’evanelia a Iesu Mesia. Tē rirora’a mai tō tātou Fa’aora e’ita te reira e tupu mai terā noa. Te hia’ai mau ’ia here, ’ia ha’api’i ’e ’ia fa’a’ite pāpū, e nehenehe e tauturu i te mau tamari’i ’ia ha’amata i te ’āpī-roa-ra’a ’ia ’ite i te fa’aurura’a o te Vārua Maita’i. E mea faufa’a roa te Vārua Maita’i nō te ’itera’a pāpū o tā tātou mau tamari’i ’e nō te fa’afāriura’a ia Iesu Mesia […]
’A feruri na i te faufa’a o te mau ’āparaura’a ’utuāfare nō ni’a i te ’evanelia a Iesu Mesia, te mau ’āparaura’a faufa’a, ’o tē nehenehe e tītau i te Vārua. ’Ia tupu ana’e te reira mau huru ’āparaura’a ’e tā tātou mau tamari’i, e tauturu tātou ia rātou ’ia ha’amau i te hō’ē niu, « ’o te niu mau ïa, ’o te tumu ’ia patuhia i ni’a e [rātou], e ’ore e ti’a ’ia ma’iri rātou i raro » [Helamana 5:12].
Nā teie mau ’āparaura’a faufa’a mau e arata’i i te mau tamari’i ’ia :
-
Māramarama i te ha’api’ira’a tumu nō te tātarahapa.
-
Roa’a te fa’aro’o i te Mesia, te Tamaiti a te Atua ora.
-
Mā’iti i te bāpetizora’a ’e i te hōro’a o te Vārua Maita’i i te va’ura’a o te matahiti.
-
’E pure ’e « haere ’āfaro noa i mua i te Fatu » [Te Parau Ha’api’ira’a ’e te mau Parau Fafau 68:28] […]
’A ha’api’i mai ai ’e ’a haere noa ai te mau tamari’i i mua, e tāmatahia tō rātou mau ti’aturira’a. Nō te mea ho’i ē ’ua ’ahu-maite-hia rātou, e nehenehe rātou e tupu i te rahi i roto i te fa’aro’o, te itoito, ’e te ti’aturi, i rōpū ato’a i te mau pāto’ira’a ’ū’ana.
’Ua ha’api’i Alama ia tātou ’ia « fa’aineine ātea i te ’ā’au o [te mau] tamari’i » [Alama 39:16]. Tē fa’aineine nei tātou i te u’i ’āpī ’ia riro ’ei mau pāruru nō ananahi nō te fa’aro’o, ’ia hāro’aro’a ē « ’e mea ti’amā [rātou] ’ia rave noa atu i tei au i tō [rātou] hina’aro—’ia mā’iti i te ’ē’a nō te pohe mure ’ore, ’aore rā, i te ’ē’a nō te ora mure ’ore » [2 Nephi 10:23]. E au i te mau tamari’i ’ia māramarama i teie parau mau rahi : te tau mure ’ore ’o te mea hape ïa i ni’a i te reira e hape ai.
’Ia riro tā ’outou mau ’āparaura’a ’ōhie e mea faufa’a rā ’e tā ’outou mau tamari’i ’ei tauturu ia rātou ’ia « ’oa’oa i te ’ite i te mau parau o te ora mure ’ore » i teienei, ’ia nehenehe rātou e ’oa’oa i te ora mure ’ore i te ao a muri atu, ’oia ato’a i te hanahana tāhuti ’ore » [Mose 6:59 ; reta tei fa’ahuru-’ē-hia].