« ’Ohipa tano ’ore e fa’atupu i te riri », Nō te Pūai o te Feiā ’Āpī, Mē 2021.
Tuha’a purera’a nō te avatea mahana mā’a
’Ohipa tano ’ore e fa’atupu i te riri
Fa’ahitira’a
E nehenehe te māuiui ’e te ’ohipa tano ’ore teimaha e tū’ati ’ore i te huru mau o te hō’ē Metua here i te ao ra ’e te maita’i. Terā rā, tē vai mau ra ’oia, e mea maita’i ’oia, ’e tē here pāpū nei ’oia i tāna mau tamari’i tāta’itahi […]
E’ita e nehenehe ’ia fa’ata’a i te tahi mau ’ohipa tano ’ore ; e mea au ’ore roa te mau ’ohipa tano ’ore ’o te ’ore e nehenehe e fa’ata’ahia […] E mea tano ’ore mau te orara’a tāhuti nei […]
[…] Tē fa’a’ite nei rā vau ma tō’u ’ā’au māuiui ato’a ē, tē hāro’aro’a nei Iesu Mesia i te ’ohipa tano ’ore ’e e mana tōna nō te hōro’a mai i te rā’au fa’aora […] ’Ua māramarama maita’i roa ’oia i te mau mea tā tātou e fārerei nei […]
[…] I roto i te mau tau mure ’ore, e fa’atītī’aifaro te Metua i te ao ra ’e ’o Iesu Mesia i te mau ’ohipa tano ’ore ato’a. E hina’aro tātou ’ia ’ite nāhea ’e ahea ra. Nāhea rāua i te rave i te reira ? Ahea ra rāua e rave ai i te reira ? ’Ia au i tō’u ’itera’a, ’aita rāua i heheu mai nāhea ’aore rā ahea. Tā’u i ’ite ’oia ho’i e rave rāua […]
E nehenehe tātou e tāmata i te tāpe’a i tā tātou mau uira’a nō ni’a i te nāhea ’e te ahea nō te tahi atu taime ’e ’ia tūtonu i ni’a i te fa’ahotura’a i te fa’aro’o ia Iesu Mesia […]
’A fa’ahotu ai tātou i te fa’aro’o ia Iesu Mesia, e ti’a ato’a ia tātou ’ia tūtava ’ia riro mai iāna te huru. I muri iho e fa’a’ite atu ai tātou i te aroha ia vetahi ’ē ’e e tāmata i te fa’aiti mai i te ’ohipa tano ’ore i te vāhi e ’ite ai tātou i te reira […]
’Eiaha e vaiiho i te ’ohipa tano ’ore ’ia fa’a’eta’eta ia ’outou, ’aore rā, ’ia fa’a’ino i tō ’outou fa’aro’o i te Atua. E ani rā i te Atua i te tauturu. E fa’arahi i tō ’outou māuruuru ’e te ti’aturi i ni’a i te Fa’aora […]
[…] E ha’amaita’ihia tō ’outou fa’aro’o i te Metua i te ao ra ’e ia Iesu Mesia hau atu i tā ’outou e nehenehe e feruri. Te mau ohipa tano ’ore ato’a—terā iho ā rā e fa’atupu i te riri—e ha’amo’ahia ïa ’ei maita’i nō ’outou.