« Inaha ! E Atua ho’i au nō te mau semeio », Nō te Pūai o te Feiā ’Āpī, Mē 2021.
Tuhaʼa pureraʼa nō te avatea sābati
« Inaha ! E Atua ho’i au nō te mau semeio »
Fa’ahitira’a
’Ua pu’e noa te mau semeio, te mau tāpa’o ’e te mau ’ohipa māere i rotopū i te feiā ’āpe’e ia Iesu Mesia i teie mahana, i roto i tō ’outou orara’a ’e tō’u iho nei. Te mau semeio e mau ’ohipa hanahana ïa, e mau fa’a’itera’a ’e e mau ’itera’a nō te mana fāito ’ore o te Atua ’e e ha’apāpūra’a ē, « hō’ē noa huru tōna inanahi, i teie nei mahana, ē a muri noa atu » [Moroni 10:19]. E ti’a ia Iesu Mesia, tei hāmani i te mau moana, ’ia tāmarū i te reira ; e ti’a iāna tei hōro’a i te ’ite i te matapō, ’ia fa’afāriu i tō tātou mata i ni’a i te ra’i ; e ti’a iāna tei tāmā i te lēpera ’ia tātā’i i tō tātou mau paruparu ; e ti’a iāna tei fa’aora i te piri’o’i ’ia pi’i ia tātou ’ia ti’a i ni’a ma te « Mai, pe’e mai » [Luka 18:22].
E rave rahi o ’outou tei ’ite i te mau semeio, hau atu i tā ’outou i ha’apa’o atu. E mea huru na’ina’i paha ’ia hi’ohia ia Iesu i te fa’ati’ara’a mai i tei pohe. E ’ere rā nā te rahi e fa’ata’a i te semeio, ’o te mea rā ē, nō ’ō mai te reira i te Atua […]
Tē vai nei te taime e tīa’i tātou i te hō’ē semeio ’ia fa’aorahia tei herehia, ’ia tauihia te hō’ē ’ohipa ti’a ’ore, ’aore rā ’ia tāmarūhia te ’ā’au o te vārua maramara ’e te māuiui. Nā roto i te mata tāhuti nei, e hina’aro tātou i te Fatu ’ia toro i tōna rima, ’ia tātā’i i te mea pararī. Nā roto i te fa’aro’o, e tae mai te semeio, e ’ere noa rā ho’i i tō tātou taime, ’e i te rāve’a i hina’arohia […]
Tē fa’aha’amana’o nei te Fatu ia tātou : « E ’ere ho’i tō ’outou ra haere’a i tō’u ra haere’a. » [Isaia 55:8]. Tāna e pūpū mai nei, ’oia ho’i : « E haere mai ’outou iā’u nei, e te feiā ato’a i ha’a rahi ’e tei teiaha i te hōpoi’a, e nā’u ’outou e fa’aora » [Mataio 11:28]—e fa’aeara’a ïa nō te ha’ape’ape’ara’a, te hepohepo, te mata’u, te ha’apa’o ’ore, te māna’ona’ora’a i tei herehia ’e i te mau moemoeā mo’emo’e ’e te fāfati. Te ’ā’au hau i roto i te ta’a ’ore ’e te ’oto e semeio ïa.