« ’Ā’au i au-tahi-māite-hia », Nō te Pūai o te Feiā ’Āpī, Mē 2021.
Tuha’a purera’a
’Ā’au i au-tahi-māite-hia
Fa’ahitira’a
I te anira’ahia, « E Rabi, tei hea te parau rahi i roto i te ture ? » pāhono atu ra te Fa’aora ’ia « hina’aro ’oe i tō Atua ia Iehova ma tō ’ā’au ato’a », ’e i muri iho « e aroha atu ’oe i tō ta’ata tupu, mai tō aroha ia ’oe iho na » [Mataio 22:36–39]. Tē ha’apūai nei te pāhonora’a a te Fa’aora i tā tātou ’ohipa i te ra’i ra. ’Ua fa’aue mai te hō’ē peropheta tahito ē, « ’eiaha e mārō te tahi i te tahi, ’ia hi’o rā i mua… ma tō [tātou] ’ā’au i au-tahi-māite-hia i te au māite ’e te aroha, te tahi i te tahi » [Mosia 18:21, reta tei fa’ahuru-’ē-hia] […]
I teienei, nō te feiā ’āpī tamāroa ’e te feiā ’āpī tamāhine, ’a pa’ari ai ’outou, e nehenehe te fa’ao’ō’ora’a ia vetahi ’ē e riro mai ’ei ’ohipa fifi. Te mana’o pe’ape’a, te hepohepo, ’e te mea ’ino roa atu ā, pinepine e mau hoa nō te fa’ari’ari’ara’a […]
Mea pāpū maita’i ē, tē fa’a’ohipa nei te ’enemi i te reira nō te fa’a’ino i tō ’outou u’i. E ’ere te reira i te vāhi i roto i tā ’outou mau reva natirara, te mau āroa, te mau fare ha’api’ira’a, te mau pupu autahu’ara’a, ’aore rā te mau piha ha’api’ira’a. ’A rave na i te mau mea ato’a e ti’a ia ’outou ’ia rave nō te fa’ariro i teie mau vāhi ’ei mau vāhi maita’i a’e ’e te hau a’e […]
[…] ’Ia fa’a’ite ana’e ’outou i te maita’i, te ’atu’atu ’e te aroha, noa atu e mea nā roto i te rorouira, tē fafau atu nei au ē, e fa’ateitei ’outou i te mau rima tautau ’e e fa’aora i te mau ’ā’au […]
E mata na tātou tāta’itahi, noa atu tō tātou fāito matahiti, ’ia tūtava ’ia riro ’ei ta’ata maita’i a’e.
Noa atu e tūtava ’outou e fa’arahi ia ’outou i roto i te here, te fa’atura ’e te hāmani maita’i, e mea pāpū roa ē, e māuiui ’outou ’aore rā e au ’ore ’outou nā roto i te mau mā’itira’a tano ’ore a vetahi ’ē. E aha ïa tā tātou e rave i reira ? E pe’e tātou i te a’ora’a a te Fatu ’ia « aroha i tō ’outou mau ’enemi […] ’e e pure ho’i i te feiā e hāmani ’ino mai ia ’outou » [Luka 6:27–28].
’Ia rave-ana’e-hia te ’ati ’e te pe’ape’a i ni’a iho ia tātou nā roto i te ’ohipa fa’a’ino, te ti’a ’ore, ’e te mana’o ’ino, e nehenehe tātou e mā’iti i te tīa’ira’a i roto i te Mesia. E tae mai teie tīa’ira’a nā roto i tāna anira’a ’e te parau fafau ’ia « ʼoaʼoa maitaʼi na, nō te mea e arataʼi atu na vau ia ʼoutou » [Te Parau Ha’api’ira’a ’e te mau Parau Fafau 78:18] ’e e fa’ariro ’oia i tō ’outou mau pe’ape’a ’ei maita’i nō ’outou [hi’o 2 Nephi 2:2].