« Te tere o te hō’ē tamari’i nā te Atua », Nō te Pūai o te Feiā ’Āpī, Mē 2021.
Tuha’a purera’a nō te avatea mahana mā’a
Te tere o te hō’ē tamari’i nā te Atua
Fa’ahitira’a
Te ta’ata tāta’itahi e haere mai i ni’a i te fenua nei, e tamaiti ta’a ’ē ïa ’e e tamāhine ta’a ’ē nā te Atua. ’Aita te tere o te hō’ē ta’ata i ha’amata i te fānaura’a. Hou te fānaura’a, i roto tātou pā’āto’a i te hō’ē ao fa’aineinera’a, i reira tātou i te fāri’ira’a « i tā [tātou] ha’api’ira’a mātāmua i roto i te ao o te mau vārua ». [Te Parau Ha’api’ira’a ’e te mau Parau Fafau] […]
’Ei tamari’i nō te fafaura’a ’e ’ei tamari’i nā te Atua, tē here nei tātou, tē fa’atura nei, tē aupuru nei, tē pāruru nei ’e tē fāri’i pōpou nei i teie mau vārua e haere mai nei nō ’ō mai i te ao hou te tāhuti nei […]
[…] ’Ua nā ’ō [te peresideni Gordon B. Hinckley] : « […] E ’ohipa ’ino te ha’amaruara’a tamari’i […] tē ’āere nei ho’i i ni’a i te fenua. »
[…] Fa’a’ite ana’e i tō tātou mau mana’o hōhonu nō ni’a i te mo’ara’a o te orara’a, ia rātou e ha’amana i te mau fa’aotira’a i roto i te sōtaiete. ’Aita paha rātou e au roa nei i te mea tā tātou e ti’aturi nei, tē pure nei rā tātou ’ia māramarama hope atu ā rātou i te tumu ho’i, nō tātou nei, ’ua hau atu ïa teie mau fa’aotira’a i te hina’aro noa o te hō’ē ta’ata nō tōna orara’a […]
Tē parau pāpū nei au ē ’aita tō ’outou iho tere ’ei tamari’i nā te Atua i ha’amata ’a huti mātāmua ai tō ’outou māhāhā i te mata’i i te fenua nei, ’e e’ita te reira e hope i te hutira’a aho hope’a i te tāhuti nei.
’Ia ha’amana’o noa tātou ē, tē tae mai nei te tamari’i vārua tāta’itahi a te Atua i te fenua nei nō tōna iho tere. ’Ia maeva tātou ia rātou, ’ia pāruru ia rātou ’e ’ia here noa ia rātou. ’A fāri’i ai ’outou i teie mau tamari’i faufa’a rahi i te i’oa o te Fa’aora ’e ’a tauturu ai ia rātou i ni’a i tō rātou tere mure ’ore, tē parau fafau nei ’au ia ’outou ē, e ha’amaita’i te Fatu ia ’outou ’e e fa’atae mai ’oia i tōna here ’e tōna mana’o fāri’i i ni’a ia ’outou.