« Te mau ’episekōpo—Te mau tīa’i māmoe i ni’a i te nana a te Fatu », Nō te Pūai o te Feiā ’Āpī, Mē 2021.
Tuha’a purera’a nā te Autahu’ara’a
Te mau ’episekōpo—Te mau tīa’i māmoe i ni’a i te nana a te Fatu
Fa’ahitira’a
E tuha’a teitei mau tā te ’episekōpo i roto i te tāvinira’a ’ei tīa’i māmoe nō te arata’i i te u’i ’āpī ia Iesu Mesia ra, tae noa atu i te mau feiā ’āpī pa’ari ’ōtahi […]
E ui paha ’outou, « nō te aha te ’episekōpo i fa’auehia ai ’ia rave i te rahira’a o te taime nō te feiā ’āpī ?» ’Ua fa’anaho te Fatu i tāna ’Ēkālesia nō te fa’aoti i te mau ’ohipa e rave mātāmua roa. ’Ia au i te fa’anahora’a ’o tāna ’Ēkālesia e piti hōpoi’a tā te ’episekōpo. E hōpoi’a ha’api’ira’a tumu tāna nō te pāroita tā’āto’a, terā rā e hōpoi’a ha’api’ira’a tumu ta’a ’ē ato’a tāna nō te pupu o te mau tahu’a […]
Rahi o ’outou te feiā ’āpī faufa’a mau tei ’ore ā i ta’a maita’i ’o vai rā ’outou ’e ’o vai ’outou a muri a’e. Terā rā, tei te ha’amatara’a noa ’outou i te ravera’a i te mau fa’aotira’a faufa’a rahi nō tō ’outou orara’a. Tē tāparu nei au, ’a ’imi na te a’o a tō ’outou nā metua ’e a tō ’outou ’episekōpo nō ni’a i te mau mā’itira’a faufa’a rahi tei mua ia ’outou. ’A fāri’i ’ia riro te ’episekōpo ’ei hoa ’e ’ei ta’ata a’o maita’i nō ’outou.
’Ua ’ite mātou ē, tē fari’i nei ’outou i te mau tāmatara’a ’e te mau fa’ahemara’a e tae mai nā te mau vāhi ato’a. E hina’arohia ia tātou pā’āto’a ’ia tātarahapa i te mahana tāta’itahi mai tā te Peresideni Nelson i ha’api’i. ’A paraparau atu i tō ’outou ’episekōpo nō ni’a i te mau mea ato’a, te mea tā te hō’ē ha’avā e nehenehe e tauturu ia ’outou ’ia fa’a’āfaro i tō ’outou orara’a ’e te Fatu i roto i te fa’aineinera’a nō teie « ’ohipa hanahana » tāna i fa’aherehere nō ’outou i teie ’anotau hope’a. Mai tā te Peresideni Nelson i ani ia ’outou, ’a fa’ati’amā na ia ’outou ’ia riro ’outou ’ei tuha’a nō te nu’u fa’ehau o te feiā ’āpī a te Fatu !