« ’Ua ’ere te pohe i tōna rē », Nō te Pūai o te Feiā ’Āpī, Mē 2021.
Tuha’a purera’a nō te po’ipo’i sābati
’Ua ’ere te pohe i tōna rē
Fa’ahitira’a
I te tahi taime o te orara’a, e ’oto tō tātou ’ā’au nō te mo’era’a te hō’ē ta’ata i herehia. I roto i teie pararera’a ma’i pohe ’ati a’e te ao nei, e rave rahi o tātou ’ua mo’e tei herehia—e melo ānei nō te ’utuāfare ’aore rā e hoa. Tē pure nei mātou nō rātou e heva ra nō te mo’era’a tei herehia […]
E nehenehe tātou e feruri i te huru o te mau hoa o Iesu, tei ’āpe’e iāna ’e tei tāvini iāna, i te ’itera’a rātou i tōna pohe. ’Ua ’ite tātou ē, « tē mihi noa ra [rātou] ma te roimata. » [Mareko 16:10] […]
[…] I te ivaraʼa o tōʼu matahiti, ’ua fa’aru’e mai tō’u tua’ane i roto i te hō’ē ’āueuera’a fenua ’ino mau. Nō te mea e ’ohipa tīa’i-’ore-hia, ’aita vau i ’apo ’oi’oi roa i te ’ohipa i tupu. ’Ua māuiui roa tō’u ’ā’au i te ’oto, ’e e uiui noa tō’u mana’o : « E aha tei tupu i ni’a i tō’u taea’e ? Tei hea ’oia ? I hea ’oia i te haerera’a ? E ’ite fa’ahou ānei au iāna ? » […]
Fātata 40 matahiti i muri mai, i te pu’e tau Pāsa, tē feruri ra vau nō ni’a i te ti’afa’ahoura’a o Iesu Mesia ’e ’ua ha’amata i te feruri i tō’u taea’e […]
I terā mahana tō’u ’itera’a ē, ’o te Vārua tei hōro’a mai i te tāmāhanahanara’a i roto i te taime fifi. E ’itera’a pāpū tā’u i fāri’i ē, ’aita te vārua o tō’u taea’e i pohe ; tē ora noa ra. Tē haere noa roa ’oia i mua i tōna vaira’a mure ’ore. ’Ua ’ite au ē « e ti’a fa’ahou mai ïa [tō’u] tua’ane » [Ioane 11:23] i terā taime rahi fa’ahiahia e ti’a fa’ahou mai ai tātou pā’āto’a, maoti te ti’afa’ahoura’a o Iesu Mesia.