« E ’ere mai tā tō te ao nei hōro’a », Nō te Pūai o te Feiā ’Āpī, Mē 2021.
Tuha’a purera’a nō te avatea mahana mā’a
E ’ere mai tā tō te ao nei hōro’a
Fa’ahitira’a
E riro te hāmani-’ino-ra’a ’e te tātama’ira’a ’ei peu mātau nō te mau aura’a i te mau mahana hope’a nei […]
Te mau taea’e ’e te mau tuahine, tē ’ite nei iho ā tātou e rave rahi roa tātama’ira’a, te riri ’e te fa’atura ’ore rahi ’ati a’e ia tātou […]
[…] Nō reira i teie Pāsa, tāmata ana’e tātou iho i te ha’amau i te hau, ma te fa’a’ohipa i te maita’i ’e te rā’au fa’aora o te tāra’ehara a te Fatu Iesu Mesia, i ni’a ia tātou iho ’e i ni’a i tō tātou ’utuāfare ’e i ni’a i te feiā ato’a tā tātou e nehenehe e toro i te rima ’ati a’e ia tātou.
[…] Tītauhia te mea tā te mau pāpa’ira’a mo’a e parau nei « te mau mana nō te ra’i ra », ’e ’ia noa’a mai teie mau mana, tītau-roa-hia ia tātou ’ia ora ma te mea tā teie iho mau ’īrava e parau nei « te mau parau tumu nō te parauti’a ra » [Te Parau Ha’api’ira’a ’e te mau Parau Fafau 121:36] […]
[…] Tei roto i te mau parau tumu nō te parauti’a te mau maita’i mai te tāparura’a, te fa’a’oromai-noa-ra’a, te marū ’e te here mau ra. ’Aita teie mau parau tumu ra, e mea pāpū ïa e fa’aruru atu tātou i te ’āmahamaha ’e te au ’ore […]
Ananahi te Pāsa, e taime nō te mau parau tumu parauti’a o te ’evanelia a Iesu Mesia ’e tāna tāra’ehara ’ia « fa’ahaere ia tātou nā ni’a atu »—nā ni’a atu i te tātama’ira’a ’e te mārōra’a, nā ni’a atu i te tapineva ’e te ’ōfatira’a ture, ’e i te hope’a nā ni’a atu i te pohe […]
Noa atu te ho’ora’ahia ’oia, noa atu te māuiui, noa atu te rave-’ino-ra’a ’e te taehae, ’e noa atu te amora’a ’oia i te mau hara ’a’ana ’e te ’oto ato’a o te tā’āto’ara’a o te ’utuāfare ta’ata nei, ’ua hi’o mai te Tamaiti a te Atua ora nā ni’a mai, i ni’a i te tere roa o te tāhuti nei, e ’ua ’ite ia tātou i teie hope’a hepetoma, ’e ’ua parau ē : « E hau tā’u e vaiiho ia ’outou nei, ’o tō’u nei hau tā’u e hō atu nō ’outou ; e ’ere mai tā tō te ao nei hōro’a tā’u hōro’a ia ’outou. ’Eiaha e taiā tō ’outou ’ā’au, ’eiaha ho’i e mata’u » [Ioane 14:27]. ’Ia maita’i ’e ’ia ’oa’oa ’e ’ia vai hau tā ’outou Pāsa.