« E tīa’i i te Mesia », Nō te Pūai o te Feiā ’Āpī, Mē 2021.
Tuha’a purera’a nō te avatea mahana mā’a
E tīa’i i te Mesia
Fa’ahitira’a
E te mau taea’e ’e te mau tuahine, i teie pu’e tau Pāsa e tūtonu tātou i ni’a i te ti’afa’ahoura’a hanahana o tō tātou Fatu ’e Fa’aora, ’o Iesu Mesia. Tē ha’amana’o nei tātou i tāna anira’a here « e haere mai ’outou iā’u nei, e te feiā ato’a i ha’a rahi, ’e tei teiaha i te hōpoi’a, ’e nā’u ’outou e fa’aora.
« ’A rave mai i tā’u zugo i ni’a ia ’outou, ’e ’ia ha’api’ihia ’outou e au, tē marū nei ho’i au ’e te ha’eha’a o te ’ā’au : ’e e noa’a ho’i te ora i tō ’outou vārua.
« Tē marū nei ho’i tā’u zugo ’e tē māmā nei tā’u hōpoi’a » [Mataio 11:28–30].
Te anira’a a te Fa’aora ’ia haere mai iāna ra, e anira’a ïa i te mau ta’ata ato’a ’eiaha ’ia haere noa iāna ra, ’ia riro ato’a rā ’ei melo nō tāna ’Ēkālesia […]
Tē hina’aro nei Iesu ’ia ’ite tātou e Metua here i te ao ra te Atua.
Te ’itera’a ē, tē herehia nei tātou nā tō tātou Metua i te ao ra, e tauturu te reira ia tātou ’ia ’ite ’o vai tātou ’e ’ia ’ite ē, tei roto tātou i tōna ’utuāfare rahi mure ’ore […]
Noa atu te mau tāmatara’a tā tātou e fārerei nei i roto i te orara’a, mai taua po’ipo’i Pāsa mātāmua ra, e ara mai i roto i te hō’ē orara’a ’āpī i roto i te Mesia ma te mau rāve’a ’āpī ’e te fa’ahiahia ’e te mau tupura’a ’āpī mai te mea e fāriu tātou i ni’a i te Fatu nō te tīa’ira’a ’e te tā’amura’a i te hō’ē mea […]
’Aita vau e parau nei nō te tīa’ira’a i roto i te Mesia mai te hō’ē moemoeā noa. Tē parau nei au i te tīa’ira’a mai te hō’ē fafaura’a e tupu iho ā. E mea faufa’a mau teie huru tīa’ira’a nō te upo’oti’a i ni’a i te ’ati, nō te ha’amaita’i i te itoito ’e te pūai pae vārua, ’e te ’itera’a ē, ’ua herehia tātou e tō tātou Metua i te ao ra ’e e mau tamari’i tātou nāna i roto i tōna ’utuāfare […]
’Eiaha roa ’ia mo’ehia ia ’outou ē, e tamari’i ’outou nā te Atua, tō tātou Metua mure ’ore, i teienei ’e a muri atu. ’Ua here ’oia ia ’outou ’e tē hina’aro nei ’e tē tītau nei te ’Ēkālesia ia ’outou. ’Oia mau, tē tītau nei mātou ia ’outou ! Tē tītau nei mātou i tō ’outou mau reo, te mau tāreni, te mau ’ite, te maita’i, ’e te parauti’a.