« Te Atua i rotopū ia tātou », Nō te Pūai o te Feiā ’Āpī, Mē 2021.
Tuha’a purera’a nō te po’ipo’i sābati
Te Atua i rotopū ia tātou
Fa’ahitira’a
’Ia mana’o ana’e tātou ia tātou iho e mea faufa’a ’ore, ’ua fa’aru’ehia, ’e ’ua ha’amo’ehia, tē ha’api’i mai nei tātou ē, e nehenehe tātou e ’ite pāpū ē, ’aita te Atua i ha’amo’e ia tātou—tē pūpū mai nei rā ’oia i tāna mau tamari’i pā’āto’a i te hō’ē mea māere rahi : ’ia riro « ’ei mau fatu ’āi’a nō te Atua, ’e ’ei mau fatu ’āi’a ’āpiti ’e te Mesia » [Roma 8:17] […]
Maoti Iesu Mesia, ’aita tō tātou mau manuia ’ore e fa’ata’a i tō tātou huru. E nehenehe te reira e ha’amaita’i ia tātou […]
Mai te mea e tātarahapa tātou, e’ita te mau hara e fa’ati’a ia tātou. E tuha’a te reira nō tō tātou haerera’a i mua […]
Pinepine au i te uiui ē, E aha tā Iesu e ha’api’i ’e e rave ’āhiri ē, tei rotopū ’oia ia tātou i teie mahana ? […]
E ha’api’i noa te Fa’aora i te mau parau mau e au i te mau tau ato’a. E au te reira nō te mau ta’ata o te mau fāito matahiti ato’a ’e i roto i te huru orara’a ato’a.
I riro nā ’e tē riro nei tāna parau poro’i ’ei poro’i nō te tīa’ira’a ’e te tā’amura’a—e fa’a’itera’a pāpū ē, e’ita roa te Atua tō tātou Metua i te ao ra e fa’aru’e i tāna mau tamari’i.
Tei rotopū te Atua ia tātou ! […]
’A ’imi ai tātou i te pe’e ia Iesu Mesia ’e ’ia haere nā ni’a i te ’ē’a o te ti’ara’a pipi, te a’o nā ni’a iho i te a’o, e tae mai te mahana e ’ite ai tātou i taua hōro’a fāito ’ore ra nō te fāri’ira’a i te ’īra’a o te ’oa’oa […]
Tē pūpū atu nei au ia ’outou i tō’u here ’e te ha’amaita’ira’a nō teie tau ’oa’oa o te Pāsa. ’A ’īriti i tō ’outou ’ā’au i tō tātou Fa’aora ’e te Tāra’ehara, noa atu te huru o tō ’outou orara’a, te mau tāmatara’a, te mau māuiui, ’aore rā, te mau hape, e ’ite mai ’outou ē, tē ora nei ’oia, tē here nei ’oia ia ’outou, ’e e maoti ’oia, e ’ore roa atu ’outou e vai ’ōtahi noa.
Tei rotopū te Atua ia tātou.