« E nehenehe ’outou e ha’aputuputu ia ’Īserā’ela ! », Nō te Pūai o te Feiā ’Āpī, Mē 2021.
Tuha’a purera’a nā te Autahu’ara’a
E nehenehe ’outou e ha’aputuputu ia ’Īserā’ela !
Fa’ahitira’a
’Ua fātata e toru matahiti i teienei, ’ua ani manihini te peresideni Russell M. Nelson i te feiā ’āpī ato’a o Te ’Ēkālesia a Iesu Mesia i te Feiā Mo’a i te mau Mahana Hope’a nei « ’ia fa’aō mai i roto i te nu’u feiā ’āpī a te Fatu nō te tauturu i te ha’aputuputu ia ’Īserā’ela » i nā pae e piti o te pāruru. ’Ua parau ’oia ē, « Taua haʼaputuputuraʼa ra ʼo te ʼohipa faufaʼa rahi roa ïa ʼo tē tupu nei i niʼa i te fenua nei i teie mahana » [« Ti’aturira’a nō Ziona » (purera’a nō te feiā ’āpī ’ati a’e i te ao, 3 nō Tiunu 2018), 8, HopeofIsrael.ChurchofJesusChrist.org]. ’Ua pāpū maita’i iā’u e nehenehe ’outou te feiā ’āpī e rave i te reira—’e ’ia rave maita’i a’e i te reira—nō te mea (1) e ’ohipa ta’a ’ē i roto i tō ’outou ihota’ata ’e (2) e mana pūai i roto ia ’outou […]
[…] Mai te au i te fa’a’itera’a a te buka ’Āpōkalupo, « e tama’i rahi tei tupu i ni’a i te ra’i ra » ! [’Āpōkalupo 12:7–8]. ’Ua fa’ahema māite Sātane hō’ē tuha’a i ni’a te toru o te mau tamari’i vārua a te Atua, ma te vaiihora’a iāna ’ia upo’oti’a, ’eiaha ra i te Atua. ’Eiaha rā ’outou ! ’Ua ’ite te ’āpōsetolo Ioane ē, ’ua upo’oti’a ’outou i ni’a ia Sātane « nā roto i te parau o tō [’outou] ’itera’a pāpū » […] [’Āpōkalupo 12:11].
[…] Te ’itera’a ē ’ua upo’oti’a ’outou i ni’a ia Sātane nā roto i te parau o tō ’outou ’itera’a pāpū i nā mua a’e, e tauturu ia ’outou ’ia here, ’ia fa’a’ite, ’e ’ia ani manihini i teienei ’e i te mau taime ato’a—’ia ani manihini ia vetahi ’ē ’ia haere mai e hi’o, ’ia haere mai e tauturu, ’ia haere mai ’e ’ia fa’aea roa mai, mai teie ā tama’i nō te mau tamari’i vārua a te Atua e tupu rahi nei […]
’Ua riro te fa’anahonahora’a a te mau tamari’i ’e te feiā ’āpī ’ei mauiha’a tohu nō te tauturu ia ’outou te feiā ’āpī ’ia ha’apūai i tō ’outou fa’aro’o […] ’A arata’i ai ’outou i te feiā ’āpī—arata’i—i roto i te orara’a i te ’evanelia, te aupurura’a ia vetahi ’ē, te ani-manihini-ra’a i te ta’ata ato’a ’ia fāri’i i te ’evanelia, te tāhō’ēra’a i te mau ’utuāfare nō te ao a muri atu, ’e te fa’atupura’a i te mau ’ohipa ri’i ’oa’oa, te fa’aro’o rahi i te Mesia tā ’outou i fāri’i i te ao vārua, e māpiha fa’ahou mai ïa ma te hōro’a ia ’outou i te mana nō te rave i tāna ’ohipa i roto i teie orara’a !