« E mea au nā’u ’ia hi’o i te hiero », Nō te Pūai o te Feiā ’Āpī, Mē 2021.
Tuha’a purera’a nō te po’ipo’i mahana mā’a
E mea au nā’u ’ia hi’o i te hiero
Fa’ahitira’a
Hiero nō Durban (’Āfirita Apato’a)
’Ua ’ite au e mau vāhi mo’a te mau hiero a te Fatu. Tā’u nei fā i teie mahana ’a paraparau ai au nō ni’a i te mau hiero, ’o te fa’arahira’a ïa i tō ’outou hina’aro ’e tō’u iho nei ’ia vai ti’amā ’e ’ia vai ineine nō te fāna’o rahi atu ā i te mau ’ohipa i te hiero, ’o tē tae mai ia tātou nei […]
’Āhani ’outou ’e ’o vau nei e haere i te hiero ma te mā nava’i ’ore, e’ita ïa e ti’a ia tātou ’ia ’ite, nā roto i te mana o te Vārua Maita’i, te ha’api’ira’a pae vārua nō ni’a i te Fa’aora ’o tā tātou e nehenehe e fāri’i i roto i te hiero.
’Ia ti’amā tātou nō te fāri’i i taua ha’api’ira’a ra, ’ei reira te tīa’ira’a, te ’oa’oa ’e te mana’o ’ana’anatae e nehenehe ai e tupu i te roara’a o te orara’a, nā roto i te ’ohipa hiero. E roa’a noa te reira tīa’ira’a, te ’oa’oa ’e te mana’o ’ana’anatae nā roto i te fāri’ira’a i te mau ’ōro’a e ravehia nei i roto i te mau hiero mo’a. Tei roto i te hiero tātou e fāri’i ai i te ha’apāpūra’a nō te mau tū’atira’a ’utuāfare here e tāmau noa i muri iho i te pohe, ’e ’o tē vai ē a muri noa atu.
[…] ’E ’ua ’ite tātou ē, tei ni’a tō tātou ’oa’oa mure ’ore i te fa’aitoitora’a nō te pūpū i taua ’oa’oa vai maoro ra i te mau ta’ata ato’a tā tātou e nehenehe.
Hō’ē ā hina’aro manuiara’a tō’u i te anira’a i te mau melo o te ’utuāfare e ora ra ’ia hina’aro ’ia vai ti’amā noa nō te fāri’i ’e nō te fa’atura i te mau ’ōro’a tā’atira’a o te hiero. E tuha’a te reira nō te ha’aputuputura’a o ’Īserā’ela i te mau mahana hope’a nei, i nā pae e piti o te pāruru.