“COVID-19 mo e Ngaahi Temipalé,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Hoʻatā Sāpaté
COVID-19 mo e Ngaahi Temipalé
Ngaahi Konga Fakamatala
ʻI he konga kimuʻa ʻo e taʻu kuoʻosí, koeʻuhí ko e fokoutua pipihi ʻo e COVID-19 mo ʻetau vilitaki ke hoko ko ha kakai lelei fakamāmani lahí, ne tau fakahoko ai ʻa e fili faingataʻa ke tāpuni fakataimi e ngaahi temipale kotoa pē. ʻI he ngaahi māhina kuo hilí, naʻe ueʻi fakalaumālie ai kimautolu ke toe fakaava fakakongokonga e ngaahi temipalé ʻi ha founga mātuʻaki tokanga moʻoni. Kuo fakaava ʻeni e ngaahi temipalé ʻi ha konga ʻe fā, ʻo muimui kakato ki he ngaahi tuʻutuʻuni fakapuleʻanga fakalotofonuá mo e ngaahi tuʻutuʻuni ki he tuʻunga malú. …
ʻOku mau houngaʻia ʻi hoʻomou faʻa kātaki mo e ngāue mateaki lolotonga e vahaʻa-taimi feliliuʻaki mo faingataʻa ko ʻení. ʻOku ou lotua ke toe mālohi ange ʻi he taimí ni, ʻa hoʻomou vilitaki ke moihū mo ngāue ʻi he temipalé ʻo laka ange ʻi ha taimi kimuʻa.
Mahalo ʻoku mou fifili he taimí ni ki he taimi te mou lava ai ʻo foki ki he temipalé. Ko e talí: ʻE fakaava homou temipalé ʻi he taimi ʻe fakangofua ai ia ʻe he ngaahi tuʻutuʻuni fakapuleʻanga fakalotofonuá. …
ʻI he taimi tatau, ʻai ke mahuʻinga taha maʻu pē hoʻomou ngaahi fuakava mo e tāpuaki fakatemipalé ʻi hoʻomou fakakaukaú mo e lotó. Faitotonu ki he ngaahi fuakava kuo mou fakahokó.
ʻOku tau ngāue he taimí ni ki he kahaʻú! …
ʻOku mau loto ke fokotuʻu e fale ʻo e ʻEikí ke toe ofi ange ki hotau kāingalotú, koeʻuhí ke nau maʻu ʻa e faingamālie toputapu ʻo e ʻalu ki he temipalé ʻi he lahi taha te nau ala malavá ʻo fakatatau mo honau ngaahi tūkungá. …
Ko e ngaahi temipalé ko ha konga mahuʻinga ia ʻo Hono Fakafoki mai ʻo e kakato ʻo e ongoongolelei ʻo Sīsū Kalaisí. ʻOku hanga ʻe he ngaahi ouau ʻo e temipalé ʻo fakafonu ʻetau moʻuí ʻaki ha mālohi mo ha ivi ʻoku ʻikai ha toe founga ke maʻu ai ia. ʻOku tau fakamālō ki he ʻOtuá koeʻuhí ko e ngaahi tāpuaki ko ʻení.