“ʻOku ʻIkai ha Mālohi ʻo e Faʻitoká,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Pongipongi Sāpaté
ʻOku ʻIkai Ikuna ʻa Faʻitoka
Ngaahi Konga Fakamatala
ʻOku ʻi ai ha ngaahi taimi ʻi heʻetau moʻuí, te tau ongoʻi loto-mamahi ai ʻi he hili ha mole atu ha taha ne tau ʻofa moʻoni ai. ʻOku ʻi ai hatau tokolahi kuo mole ha ngaahi ʻofaʻanga ʻi he mahaki fakaʻauha fakaemāmani lahi lolotongá—ko ha mēmipa ʻo e fāmilí pe kaungāmeʻa. ʻOku mau lotua ʻa kinautolu kuo nau tengihia ha faʻahinga mole pehē. …
ʻOku tau fakakaukau atu ki he ngaahi kaungāmeʻa ʻo Sīsuú ʻa ia ne nau muimui kiate Ia mo tauhi kiate Iá, ʻa e ongo ne nau maʻu ʻi heʻenau mamata tonu ki Heʻene pekiá. ʻOku tau ʻiloʻi pē naʻa nau “mamahi mo tangi” [Maʻake 16:10]. …
… ʻI hoku taʻu hivá, ne mole hoku tuongaʻane lahí ʻi ha mofuike fakamanavahē. Koeʻuhi naʻe hoko fakatuʻupakē, ne kiʻi fuofuoloa peá u toki makupusi ʻa e moʻoni ʻo e meʻa naʻe hokó. Ne lomekina hoku lotó ʻe he mamahí, ʻo u fehuʻi loto pē, “Ko e hā ne hoko ki hoku tuongaʻané? ʻOkú ne ʻifē? ʻOkú ne ʻalú ki fē? Te u toe sio nai kiate ia?” …
Hili ha taʻu ʻe 40 mei ai, lolotonga e taimi Toetuʻú, ne u fakalaulauloto ki he Toetuʻu ʻa Sīsū Kalaisí ʻo kamata fakakaukau ki hoku tuongaʻané. …
ʻI he ʻaho ko iá, ne u ʻiloʻi naʻe fakafiemālieʻi au ʻe he Laumālié ʻi ha taimi faingataʻa. Kuó u maʻu ha fakamoʻoni ʻoku ʻikai ke mate e laumālie ia ʻo hoku tuongaʻané; ʻokú ne moʻui. ʻOkú ne kei fakalakalaka atu pē ʻi hono nofoʻanga taʻengatá. ʻOku ou ʻiloʻi ʻe “toe tuʻu [hoku] tuongaʻané” [Sione 11:23] ʻi he momeniti mahuʻinga ko iá, pea koeʻuhi ko e Toetuʻu ʻa Sīsū Kalaisí, te tau toetuʻu hono kotoa.