“Sīsū Kalaisi: Ko e Tauhi ʻo Hotau Laumālié,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Pongipongi Sāpaté
Sīsū Kalaisi: Ko e Tauhi ʻo Hotau Laumālié
Ngaahi Konga Fakamatala
ʻOku fiefia hoku lotó ʻi heʻeku manatu ki he meʻa fakaofo taha, fakaʻeiʻeiki taha, ʻa e ngāue ʻoku ʻikai fakatataua ʻa ia kuo hoko ʻi he hisitōlia kotoa ʻo e faʻahinga ʻo e tangatá—ʻa e feilaulau fakalelei ʻa hotau ʻEiki ko Sīsū Kalaisí. …
Naʻe fakahoko lelei ʻe Kalaisi ʻa e finangalo ʻo e Tamaí ʻi Heʻene feilaulau manavaʻofa mo taʻefakangatangatá. Naʻá Ne ikunaʻi e huhu fakatuʻasino mo fakalaumālie ʻo e maté, naʻe hoko mai ki he māmaní ʻi he Hingá, pea ke tau malava ai ke maʻu ʻa e faingamālie nāunauʻia ʻo e fakamoʻui taʻengatá. …
Neongo naʻe toʻo taʻe toe ʻi ai ha makatuʻunga ʻe he Fakamoʻuí e ngaahi haʻahaʻa ʻo e mate fakatuʻasinó, ka naʻe ʻikai te Ne toʻo ai hotau fatongia fakataautaha ke fakatomala mei he ngaahi angahala ʻoku tau fakahokó. …
Siʻoku kaungāmeʻa, ʻoku ou fakamoʻoni atu ʻi heʻetau fakatomala fakamātoato mei heʻetau ngaahi angahalá, ʻoku tau fakaʻatā ai e feilaulau fakalelei ʻa Kalaisí ke hoko ko e konga ʻaonga taha ia ʻi heʻetau moʻuí. …
Makehe mei hono ʻomi ʻo e meʻafoaki fakaʻeiʻeiki ko ʻeni ʻo e fakamoʻuí, ʻoku toe ʻomi ʻe he Fakamoʻuí e fakafiemālie mo e nonga ʻi heʻetau fehangahangai mo e mamahí, ʻahiʻahí, mo e ngaahi vaivai ʻo e moʻui fakamatelié, kau ai e ngaahi tūkunga kuo tau toki foua ʻi he mahaki fakaʻauha fakaemāmani lahí. …
ʻI heʻetau ʻunu ke ofi ange kiate Iá, mo tau tukulolo fakalaumālie ki Heʻene tauhí, ʻe lava leva ke tau toʻo kiate kitautolu ʻEne haʻamongá, ʻa ia ʻoku faingofua, pea mo ʻEne kavengá, ʻa ia ʻoku maʻamaʻa, ʻo maʻu leva e fiemālie mo e nonga naʻe talaʻofa maí. Makehe mei aí, te tau maʻu e mālohi ʻoku tau fie maʻu kotoa ke ikunaʻi ʻaki e ngaahi faingataʻá, vaivaí, mo e mamahi ʻo e moʻuí, ʻa ia ʻoku matuʻaki faingataʻa ke kātekina taʻe kau ai ʻEne tokoní mo e mālohi faifakamoʻuí.