“Vakai! Ko e ʻOtua Au ʻo e Ngaahi Maná,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Hoʻatā Sāpaté
“Vakai! Ko e ʻOtua Au ʻo e Ngaahi Maná”
Ngaahi Konga Fakamatala
ʻOku lahi ha ngaahi mana, ngaahi fakaʻilonga mo ha ngaahi meʻa fakaofo ʻi he lotolotonga ʻo e kau muimui ʻo Sīsū Kalaisí ʻi he kuonga ko ʻení, ʻi hoʻomou moʻuí mo ʻeku moʻuí. Ko e maná ko ha ngaahi ngāue mo hano fakahaaʻi fakalangi ia ʻo e mālohi taʻefakangatangata ʻo e ʻOtuá pea mo hano fakamoʻoniʻi ʻokú Ne, “tatau ʻi he ʻaneafí, ʻaho ní pea taʻengata” [Molonai 10:19]. ʻE lava ʻe Sīsū Kalaisi, ʻa ia naʻá Ne fakatupu ʻa e ngaahi tahí, fakanonga kinautolú; ʻa Ia naʻá Ne fakaʻā ʻa e kuí ʻo fakahanga hotau fofongá ki he langí; ʻa Ia naʻá Ne fakamaʻa ʻa e kiliá ʻo fakaleleiʻi hotau ngaahi vaivaí; ʻa Ia naʻá Ne fakamoʻui ʻa e tangata vaivaí ʻo ui kitautolu ke tau tuʻu hake, ʻaki ʻa e “Haʻu, ʻo Muimui ʻIate Au” [Luke 18:22].
Kuo fakamoʻoniʻi ʻe hamou tokolahi ʻa e ngaahi maná, ʻo lahi ange ia he meʻa ʻoku mou fakatokangaʻí. Mahalo te nau ngali siʻisiʻi ʻi hono fakafehoanaki ki hono fokotuʻu ʻe Sīsū ʻa e pekiá. ʻOku ʻikai mahuʻinga ia pe ko e hā e tuʻunga fakaofo ʻo e maná, ka ko ʻene haʻu ko ia mei he ʻOtuá. …
ʻOku ʻi ai ha ngaahi taimi ʻoku tau ʻamanaki ai ki ha mana ke fakamoʻui hatau ʻofaʻanga, ke fakafoki ha ngāue hala, pe ke fakamolū e loto ʻo ha tokotaha faingataʻaʻia pe mamahi. ʻI heʻetau vakai ki he ngaahi meʻá ʻi ha mata fakamatelié, ʻoku tau fie maʻu ai e ʻEikí ke alanima mai, ke fakaleleiʻi ʻa ia kuo maumaú. ʻI heʻetau maʻu ʻa e tuí, ʻe hoko mai ʻa e maná, neongo he ʻikai hoko ia ʻi he taimi ʻa kitautolú pe ʻi he founga ʻoku tau loto ki aí. …
Kuo fakamanatu mai ʻe he ʻEikí, “Pea ʻoku ʻikai ko homou ngaahi halá ʻa hoku ngaahi halá” [ʻĪsaia 55:8]. ʻOkú Ne folofola mai, “Haʻu kiate au ʻakimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu” [Mātiu 11:28]—mālōlō mei he loto-hohaʻá, loto-mamahí, manavaheé, talangataʻá, hohaʻa ki ha ki ha taha ʻoku ʻofa ai, pe ki ha ngaahi fakaʻamu kuo mole pe holofa. Ko e fiemālie ʻi he lotolotonga ʻo e veiveiuá pe mamahí ko ha mana ia.