“ʻAmanaki Lelei ʻia Kalaisi,” Ki Hono Fakamālohia ʻo e Toʻu Tupú, Mē 2021.
Fakataha ʻo e Hoʻatā Tokonakí
ʻAmanaki Lelei ʻia Kalaisi
Ngaahi Konga Fakamatala
ʻE kāinga, ʻi he taimi Toetuʻu ko ʻení ʻoku tau hanga taha ai ki he Toetuʻu nāunauʻia ʻa hotau ʻEiki mo e Fakamoʻui ko Sīsū Kalaisí. ʻOku tau manatua ʻa ʻEne fakaafe loto-ʻofa ke “haʻu kiate au ʻa kimoutolu kotoa pē ʻoku feinga mo mafasiá, pea te u foaki ʻa e fiemālié kiate kimoutolu.
“Toʻo ʻeku haʻamongá kiate kimoutolu, pea mou ako ʻiate au; he ʻoku ou angavaivai mo angamalū: pea te mou ʻilo ai ʻa e fiemālié ki homou laumālié.
“He ʻoku faingofua pē ʻeku haʻamongá, pea ʻoku maʻamaʻa ʻeku kavengá” [Mātiu 11:28–30].
Ko e fakaafe ʻa e Fakamoʻuí ke haʻu kiate Iá ko ha fakaafe ia ki he tokotaha kotoa pē ke ʻoua naʻa ngata pē ʻi he haʻu kiate Iá ka ke kau mai foki ki Hono Siasí. …
ʻOku finangalo ʻa Sīsū ke tau ʻiloʻi ko e ʻOtuá ko ha Tamai Hēvani ʻoku ʻofa.
ʻE tokoni ʻa hono ʻiloʻi ʻoku ʻofaʻi kitautolu ʻe heʻetau Tamai Hēvaní ke tau ʻiloʻi ko hai kitautolu pea ke tau ʻiloʻi ʻoku tau kau ki Hono fāmili maʻongoʻonga taʻengatá. …
… Neongo e ngaahi pole ʻoku tau fehangahangai mo ia ʻi he moʻuí, ka ʻe lava ke tau kamata ha tūkunga foʻou ʻo e moʻuí koeʻuhí ko Kalaisi, ʻo hangē ko e ʻuluaki pongipongi ʻo e Toetuʻú, ko ha ngaahi faingamālie foʻou mo fakaofo mo ha ngaahi moʻoni foʻou ʻi heʻetau tafoki ki he ʻEikí ki ha ʻamanaki lelei mo ha ongoʻi ʻoku fakakau kitá.
ʻOku ou lea ki he ʻamanaki lelei ʻia Kalaisí ʻo ʻikai ko ha fakakaukau fakaumiuminoa pē. Ka, ʻoku ou lea ki he ʻamanaki lelei mo ha fakatuʻamelie ʻe hoko ʻo moʻoní. ʻOku mahuʻinga ʻa e faʻahinga ʻamanaki lelei peheé ki hono ikunaʻi ʻo e filí, tanumaki ha mālohi mo e ivi fakalaumālié, pea mo hono ʻiloʻi ʻoku ʻofaʻi kitautolu ʻe heʻetau Tamai Taʻengatá pea ko ʻEne fānau ʻa kitautolu ʻoku tau kau ki Hono fāmilí. …
ʻOua naʻa teitei ngalo ko ha fānau koe ʻa e ʻOtuá, ʻa ʻetau Tamai Taʻengatá, ʻi he taimí ni pea taʻengata. ʻOkú Ne ʻofa ʻiate koe, pea ʻoku fie maʻu koe ʻe he Siasí ʻIo, ʻoku mau fie maʻu koe! ʻOku mau fie maʻu ho leʻó, talēnití, taukeí, angaleleí mo e angamāʻoniʻoní.