“Ngaahi Fepōtalanoaʻaki Mahuʻingá,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Pongipongi Sāpaté
Ngaahi Fepōtalanoaʻaki Mahuʻingá
Ngaahi Konga Fakamatala
He ʻikai ke tau lava ʻo tatali ʻataʻatā pē ke hoko ʻa e uluí ki heʻetau fānaú. Ko e ului ʻoku tupukoso peé ʻoku ʻikai ko ha tefitoʻi moʻoni ia ʻo e ongoongolelei ʻo Sīsū Kalaisí. He ʻikai hoko noa pē ʻa e hoko ʻo hangē ko hotau Fakamoʻuí. ʻE lava ke tokoni hono fakapapauʻi ʻetau ʻofá, akonakí, mo e fakamoʻoní ke kamata kei siʻi ʻa e fānaú ke ongoʻi e ivi tākiekina ʻo e Laumālie Māʻoniʻoní. ʻOku mahuʻinga ʻa e Laumālie Māʻoniʻoní ki he fakamoʻoni mo e ului ʻetau fānaú kia Sīsū Kalaisí. …
Fakakaukau ki he mahuʻinga ʻo e ngaahi fepōtalanoaʻaki fakafāmili fekauʻaki mo e ongoongolelei ʻo Sīsū Kalaisí, ʻa e ngaahi fepōtalanoaʻaki mahuʻinga ʻe lava ke ne fakaafeʻi mai ʻa e Laumālié. ʻI heʻetau fakahoko e ngaahi fepōtalanoaʻaki pehē mo ʻetau fānaú, ʻoku tau tokoni ai ke nau fokotuʻu ha fakavaʻe, “ʻa ia ko e makatuʻunga mālohi, ʻa ia ko ha makatuʻunga kapau [te nau] langa ai ʻe ʻikai lava ke nau hinga” [Hilamani 5:12].
ʻE lava ke tataki ʻa e fānaú ʻe he ngaahi fealeaʻaki mahuʻinga ko ʻení ke:
-
Mahino e tokāteline ʻo e fakatomalá.
-
Maʻu e tui kia Kalaisi, ko e ʻAlo ʻo e ʻOtua moʻuí.
-
Fili e papitaisó mo e meʻafoaki ʻo e Laumālie Māʻoniʻoní ʻi he hokosia honau taʻu valú.
-
Pea lotu mo “ʻaʻeva angatonu ʻi he ʻao ʻo e ʻEikí”[Tokāteline mo e Ngaahi Fuakava 68:28]. …
ʻI he ako mo tupulaki ʻa e fānaú, ʻe poleʻi ʻa e ngaahi meʻa ʻoku nau tui ki aí. Ka ʻi hono fakateunga lelei kinautolú, te nau lava ʻo tupulaki ʻi he tuí, loto-toʻá, mo e loto-falalá, ʻo aʻu pē ki he lotolotonga ʻo e fakafepaki mālohí.
Naʻe akoʻi mai ʻe ʻAlamā ke tau “teuteu ʻa e ʻatamai ʻo [e] fānaú.” [ʻAlamā 39:16]. ʻOku tau teuteuʻi e toʻu tangata kei tupu haké ke nau hoko ko e kau taukaveʻi ʻo e tuí he kahaʻú, ke mahino kiate kinautolu “ʻoku [nau] tauʻatāina ke ngāue [maʻanautolu] pē—ke fili ʻa e hala ʻo e mate taʻengatá pe ko e hala ʻo e moʻui taʻengatá.” [2 Nīfai 10:23]. ʻOku fie maʻu ke mahino ki he fānaú ʻa e moʻoni maʻongoʻongá ni: ko ʻitānití ʻoku ʻikai ko ha meʻa ia ʻoku totonu ke maʻu hala ki ai.
Fakatauange ʻe tokoni ʻetau fepōtalanoaʻaki mahuʻinga kae faingofua mo ʻetau fānaú ke nau “fiefia ʻi he ngaahi folofola ʻo e moʻui taʻengatá” ʻi he taimí ni, kae lava ke nau fiefia ʻi he “moʻui taʻengata ʻi he maama ka hoko maí, ʻio ʻa e nāunau taʻe-faʻa-maté” [Mōsese 6:59; tānaki atu hono fakamamafaʻí].