“Taʻe-totonu Fakatupu Loto-Lili,” Ki Hono Fakamālohia ʻo e Toʻu Tupú, Mē 2021.
Fakataha ʻo e Hoʻatā Tokonakí
Taʻe-totonu Fakatupu Loto-Lilí
Ngaahi Konga Fakamatala
ʻE lava ke hangē ʻoku ʻikai fenāpasi lelei ʻa e taʻetotonú pea mo hono moʻoni ʻo ha Tamai Hēvani angaʻofa mo ʻofá. Kae hili ko iá ʻokú Ne moʻui, ʻokú Ne angaʻofa, pea ʻokú Ne ʻofa haohaoa ki Heʻene fānaú takitaha. …
ʻOku ʻi ai ha taʻetotonu ʻe niʻihi ʻoku ʻikai lava ke fakamatalaʻi; ko e taʻetotonu taʻe-mafakamatalaʻí ʻoku fakatupu loto-lili ia. … ʻOku fakanatula pē ʻa e taʻetotonu ʻa e moʻui fakamatelié. …
… ʻOku ou talaki ʻaki hoku lotó kotoa ʻoku ʻafioʻi ʻe Sīsū Kalaisi ʻa e taʻetotonú pea ʻokú Ne toe maʻu mo e mālohi ke fakaleleiʻi ʻa e taʻetotonú. … ʻOku mahino lelei kiate Ia ʻa e meʻa ʻoku tau fouá. …
… ʻE fakaleleiʻi ʻe he Tamai Hēvaní mo Sīsū Kalaisi ʻa e ngaahi taʻetotonu kotoa pē ʻi he taʻengatá. ʻOku mahino pē te tau fakaʻamu ke ʻiloʻi ʻa e foungá mo e taimí. ʻE founga fēfē nai ʻEna fakahoko iá? Ko e taimi fē te Na fakahoko ai iá? ʻI heʻeku ʻiló, kuo teʻeki ke Na fakahā ʻa e foungá pe taimí. Ko e meʻa pē ʻoku ou ʻiloʻí te Na fakahoko ia. …
Te tau lava ʻo feinga ke fakatatali ʻetau ngaahi fehuʻi fekauʻaki mo e foungá mo e taimí ki ha taimi ʻamui ange kae tokanga taha ki hono fakatupulaki e tui kia Sīsū Kalaisí. …
ʻI heʻetau fakatupulaki ʻa e tui kia Sīsū Kalaisí, ʻoku totonu foki ke tau feinga ke hoko ʻo hangē ko Iá. ʻOku tau feohi leva mo e niʻihi kehé ʻaki e manavaʻofa pea feinga ke fakasiʻisiʻi ʻa e taʻetotonú ʻi he feituʻu ʻoku tau ʻilo ai iá. …
ʻOua naʻa tuku ke fakafefeka ʻe he taʻetotonú koe, pe fakavaivaiʻi hoʻo tui ki he ʻOtuá. Ka, ke kole tokoni ki he ʻOtuá. Fakalahi hoʻo loto-houngaʻiá mo e falala ki he Fakamoʻuí. …
… ʻE totongi atu hoʻo tui ki he Tamai Hēvaní mo Sīsū Kalaisí ʻo lahi ange ʻi he meʻa te ke mafakakaukauá. ʻE fakatapui ʻa e taʻetotonu kotoa pē—tautautefito ki he taʻetotonu ʻoku fakatupu loto-lilí—ke hoko ia ko ha tāpuaki kiate koe.