“ʻOku ʻIate Kitautolu ʻa e ʻOtuá,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Pongipongi Sāpaté
Ko e ʻOtua ʻi Hotau Lotolotongá
Ngaahi Konga Fakamatala
ʻI heʻetau ongoʻi ʻoku ʻikai ke tau mahuʻingá, tuenoa, mo liʻekiná, ʻoku tau ʻilo ʻe lava ke fakapapauʻi mai kuo teʻeki ke fakangaloʻi kitautolu ʻi he ʻOtuá— ko hono moʻoní, ʻokú Ne foaki ki Heʻene fānaú kotoa ha meʻa fakaofo: ke hoko ko e “kau [ʻea] hoko ki he ʻOtuá, pea ko e kau [ʻea] hoko fakataha mo Kalaisi” [Loma 8:17]. …
Koeʻuhí ko Sīsū Kalaisi, ʻoku ʻikai fie maʻu ia ke ʻilo ʻaki kitautolu ʻetau ngaahi tōnounoú. Te nau lava ʻo fakaleleiʻi kitautolu. …
Kapau te tau fakatomala, he ʻikai fakataʻeʻaongaʻi kitautolu ʻe he ngaahi fehalaākí. Ko ha konga kinautolu ʻetau tupulakí. …
Kuó u faʻa fifili pe ko e hā ʻe akoʻi mo fakahoko ʻe Sīsuú ʻo kapau naʻá Ne ʻi heni mo kitautolu ʻi he ʻahó ni? …
ʻOku akoʻi maʻu pē ʻe he Fakamoʻuí ha ngaahi moʻoni tuʻuloa. ʻOku kaunga ia ki he kakai ʻi he kuonga kotoa pē mo ha faʻahinga tūkunga pē.
Ko ʻEne pōpoakí ko ha pōpoaki ia ʻo e ʻamanaki lelei mo e kau maí—ko ha fakamoʻoni kuo teʻeki ke liʻaki ʻe he ʻOtua ko ʻetau Tamai Hēvaní ʻa ʻEne fānaú.
ʻOku ʻi hotau lotolotongá ʻa e ʻOtuá! …
ʻI heʻetau feinga ke muimui kia Sīsū Kalaisi mo ʻaʻeva ʻi he hala ʻo e tuʻunga fakaākongá, ʻi he ʻotu lea ki he ʻotu lea, ʻe hokosia ʻa e ʻaho te tau aʻusia ai e meʻaʻofa fakaofo ko ia ʻo hono maʻu ha kakato ʻo e fiefiá. …
ʻOku ou ʻofa atu mo ʻoatu ʻeku tāpuakí maʻamoutolu ʻi he faʻahitaʻu Toetuʻu fiefiá ni. Fakaava homou lotó ki hotau Fakamoʻuí mo e Huhuʻí, neongo pe ko e hā homou ngaahi tūkungá, faingataʻá, mamahí, pe fehalaākí; te mou lava ʻo ʻiloʻi ʻokú Ne moʻui, ʻokú Ne ʻofa ʻiate kimoutolu, pea koeʻuhí ko Ia, he ʻikai te mou teitei tuenoa.
ʻOku ʻiate kitautolu ʻa e ʻOtuá.