“Ko e Ngaahi Tefitoʻi Moʻoni ʻo ʻEku Ongoongoleleí,” Ki Hono Fakamālohia ʻo e Toʻu Tupú, Mē 2021.
Fakatahaʻanga ʻo e Hoʻatā Sāpaté
Ko e Ngaahi Tefitoʻi Moʻoni ʻo ʻEku Ongoongoleleí(Tokāteline mo e Ngaahi Fuakava 42:12)
Ngaahi Konga Fakamatala
Laʻitā mei he Getty Images
Ko e tefitoʻi moʻoni ʻo e ongoongoleleí ko ha fakahinohino fakatokāteline ia ki hono ngāue totonu ʻaki ʻo e tauʻatāina ke filí. ʻOku tupu e ngaahi tefitoʻi moʻoní mei ha ngaahi moʻoni loloto ange ʻo e ongoongoleleí pea ʻoku nau ʻomi ha fakahinohino mo ha ngaahi tuʻunga moʻui pau ʻi heʻetau vivili atu ki muʻa ʻi he hala ʻo e fuakavá. …
ʻOku fakamālohia ʻe hono ako, mahino mo moʻui ʻaki e ngaahi tefitoʻi moʻoni ʻo e ongoongoleleí ʻa ʻetau tui ki he Fakamoʻuí, fakaloloto ange ʻetau moʻui līʻoa kiate Iá, mo fakaafea ha ngaahi tāpuaki mo ha ngaahi meʻafoaki fakalaumālie lahi ki heʻetau moʻuí. ʻE lava foki ke tokoniʻi kitautolu ʻe he ngaahi tefitoʻi moʻoni ʻo e angamāʻoniʻoní ke tau vakai ʻo ope atu ʻi hotau ngaahi fiemālieʻangá mo e ngaahi fiemaʻu fakatāutahá ʻaki hono ʻomi ha fakakaukau mahuʻinga ʻo e moʻoni taʻengatá ʻi heʻetau foua e ngaahi tuʻunga, ngaahi pole, ngaahi fili mo e ngaahi aʻusia kehekehe ʻo e moʻui fakamatelié. …
ʻI he taimi ne tuku pōpula ai ʻa Siosefa Sāmita ʻi he Fale Fakapōpula Lipetií, naʻá ne fakahoko ha ngaahi tohi fakahinohino ki he kāingalotú mo e kau taki ʻo e Siasí ʻo fakamanatu kiate kinautolu “ʻoku ʻaonga lahi ki he vaka lahí ha kiʻi fohe ʻuli siʻisiʻi ʻi he lolotonga ʻo e matangí, ʻo ka tauhi ʻa e vaká ke fengāueʻaki lelei mo e matangí pea mo e ngaahi peaú.” [Tokāteline mo e Ngaahi Fuakava 123:16].
Ko e “fohe ʻulí” ko ha meʻa fakaʻuli pe kau ʻo e fohe ʻulí pea ko e meʻangāue ia ʻoku fakaʻaongaʻi ki hano puleʻi e hala fononga ʻo ha vaka. Pea ʻoku ʻuhinga ʻa e “tauhi ʻa e vaká ke fengāueʻaki lelei mo e matangí pea mo e ngaahi peaú” ki hono levaʻi ʻo ha vaka ke kei mafamafatatau ke ʻoua naʻa mafuli lolotonga ha matangi.
ʻOku tuʻunga tatau pē ʻa e ngaahi tefitoʻi moʻoni ʻo e ongoongoleleí kiate au mo koe ʻo hangē pē ko e fohe ʻulí ki ha vaka. ʻOku fakaʻatā kitautolu ʻe he ngaahi tefitoʻi moʻoni totonú ke tau ʻilo hotau halá mo tuʻu maʻu, tuʻu ʻaliʻaliaki mo taʻe lava ke ueʻi ke ʻoua naʻa tau fakahoko ha ngaahi fehalaaki ʻi he lotolotonga ʻo e ngaahi pole mo e ngaahi fakakaukau fakapuputuʻu ʻo e ngaahi ʻaho ní.