“Taha e Lotó,” Ki Hono Fakamālohia ʻo e Toʻu Tupú, Mē 2021.
Fakatahaʻangá
Taha e Ngaahi Lotó
Ngaahi Konga Fakamatala
ʻI he taimi naʻe fehuʻi ai, “ʻEiki, ko e fē ʻa e fekau ʻoku lahí?” naʻe tali ʻe he Fakamoʻuí ke “ʻofa [ki he ʻEiki] ko ho ʻOtuá ʻaki ho lotó kotoa,” pea muimui atu ai “Ke ke ʻofa ki ho kaungāʻapí ʻo hangē pē ko koé” [Mātiu 22:36-39]. ʻOku fakamamafaʻi mai ʻe he tali ʻa e Fakamoʻuí ʻa hotau fatongia fakalangí. Naʻe fekau ʻe ha palōfita he kuongamuʻá “ke ʻoua naʻa ʻi ai ha fakakikihi ʻiate [kitautolu] ka ʻoku totonu ke [tau] sio ki muʻa … ke taha [hotau] lotó ʻi he uouangataha mo e feʻofoʻofani.” [Mōsaia 18:21, tānaki atu hono fakamamafaʻí]. …
Sai, ʻe kau talavou mo e kau finemui, ʻi hoʻomou matuʻotuʻa angé, ʻe lava ke mātuʻaki fakatuʻutāmaki ʻaupito ʻa hono fakakata ʻaki e niʻihi kehé. ʻOku faʻa hoko e loto-tailiilí, loto-taʻotaʻomiá, pea kovi ange ko e faʻa kau atu mo e houtamakí. …
Ko hono moʻoní ʻoku fakaʻaongaʻi ʻeni ʻe he filí ke fakamamahiʻi ʻaki homou toʻu tangatá. ʻOku ʻikai totonu ke hoko ʻeni ʻi he ngaahi feituʻu he ʻinitaneti ʻoku mou fakaʻaongaʻí, ngaahi kaungāʻapí, ngaahi ʻapiakó, ngaahi kōlomú, pe ngaahi kalasí. Kātaki ʻo fakahoko e meʻa kotoa pē te mou lavá ke ngaohi e ngaahi feituʻu pehení ke angaʻofa ange mo malu ange. …
… ʻI hoʻo angaʻofa, tokanga, mo manavaʻofá, naʻa mo e fakakomipiutá, ʻoku ou palōmesi atu te ke hiki hake ʻa e nima ʻoku tautau ki laló mo faitoʻo e ngaahi lotó. …
ʻOfa ke tau fāifeinga ke fakahoko hotau lelei tahá, neongo pe ko e hā hotau taʻu motuʻá.
ʻI hoʻo fāifeinga ke ke ʻofa, fakaʻapaʻapa, mo angaʻofá, ʻe pau pē ke ke mamahi pe kaunga kovi kiate koe ʻa e ngaahi fili ʻa e niʻihi kehé ʻoku ʻikai leleí. Ko e hā leva te tau fakahokó? Tau muimui ki he fekau ʻa e ʻEikí ke “ʻofa ki homou ngaahi filí … pea hūfia ʻa kinautolu ʻoku fai kovi mo fakatanga kiate kimoutolú” [Luke 6:27-28].
ʻI he taimi ʻoku tau fepaki ai mo e filí mo e faingataʻá koeʻuhí ko e ngaahi tōʻonga fakatuʻutāmaki, kovi, mo angakoví, te tau lava ʻo fili ke maʻu ha ʻamanaki lelei ʻia Kalaisi. ʻOku maʻu e ʻamanaki lelei ko ʻení mei Heʻene fakaafe mo e talaʻofa “ke mou fiefia, he te u tataki atu ʻa kimoutolu” [Tokāteline mo e Ngaahi Fuakava 78:18] pea te Ne fakatapui homou ngaahi faingataʻá ke hoko ʻo ʻaonga kiate kimoutolu [vakai 2 Nīfai 2:2].