“Te ke Lava ke Tānaki ʻa ʻIsileli!,” Ki Hono Fakamālohia ʻo e Toʻu Tupú, Mē 2021.
Fakataha Lakanga Fakataulaʻeikí
Te Ke Lava ke Tānaki ʻa ʻIsileli!
Ngaahi Konga Fakamatala
Naʻe fakaafeʻi ʻe Palesiteni Lāsolo M. Nalesoni ʻa e toʻu tupu kotoa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻi he meimei taʻu ʻe tolu kuo hilí, ke nau kau ʻi he “konga kau tau kei talavou ʻa e ʻEikí ke tānaki ʻa ʻIsileli” ʻi he ongo tafaʻaki fakatouʻosi ʻo e veilí. Naʻá ne pehē, “Ko e tānaki fakataha ko iá ʻa e meʻa mahuʻinga taha ʻoku hoko ʻi he māmaní ʻi he ʻaho ní” [“ʻAmanakiʻanga ʻo e ʻIsilelí” (worldwide youth devotional, 3 ʻo Sune, 2018), 8, HopeofIsrael.ChurchofJesusChrist.org]. ʻOku ou ʻiloʻi pau ʻe lava ʻe kimoutolu toʻu tupú ʻo fai ʻeni—mo fakahoko lelei moʻoni ia—koeʻuhí ko ha (1) meʻa fekauʻaki mo hoʻomou tuʻunga totonú pea mo ha (2) mālohi lahi fau ʻoku ʻiate kimoutolu. …
… Fakatatau ki he tohi ʻa Fakahaá, “naʻe ʻi ai ha tau ʻi he langí”! [Fakahā 12:7–8]. Naʻe kākaaʻi ʻe Sētane ha vahe tolu ʻe taha ʻo e fānau fakalaumālie ʻa e Tamai Hēvaní ke nau tuku ke ne lāngilangiʻia kae ʻikai ko e ʻOtuá. Kae naʻe ʻikai ke mou pehē! Naʻe mamata ʻa e ʻAposetolo ko Sioné ne mou ikunaʻi ʻa Sētane ʻaki “e lea ʻo [hoʻomou] fakamoʻoní.” … [Fakahā 12:11].
… ʻE tokoni hoʻomou ʻiloʻi ne mou ikunaʻi ʻa Sētane ʻi he ngaahi taʻu lahi kuo hilí, ʻaki e lea ʻo hoʻomou fakamoʻoní ke mou ʻofa, vahevahe, pea mo fakaafeʻi he ʻahó ni pea maʻu ai pē— ha niʻihi kehe ke nau haʻu ʻo mamata, haʻu ʻo tokoni, mo haʻu ʻo kau, ʻo hangē ko e hokohoko atu e tau tatau ko ia ki he ngaahi laumālie ʻo e fānau ʻa e ʻOtuá.
Ko e polokalama ʻa e Fānaú mo e Toʻu Tupú ko ha meʻangāue fakaepalōfita ia ke tokoni atu kiate kimoutolu toʻu tupú ke fakamālohia hoʻomou tui maʻongoʻongá. … ʻI he taki ko ia ʻe kimoutolu toʻu tupú—taki ʻi hono moʻui ʻaki e ongoongoleleí, ʻi he tokoniʻi ʻo e niʻihi kehé, fakaafeʻi e taha kotoa ke nau tali e ongoongoleleí, fakatahaʻi e ngaahi fāmilí ke taʻengatá, mo fokotuʻutuʻu ha ngaahi ʻekitivitī fakafiefiá, ʻe toe ake mai e tui lahi ne mou maʻu ʻi he moʻui fakalaumālié ʻo fakaivia kimoutolu ke fai e ngāue ʻa e ʻEikí ʻi he moʻuí ni!