“ʻUhinga e Hala ʻo e Fuakavá,” Ki Hono Fakamālohia ʻo e Toʻu Tupú, Mē 2021.
Fakatahaʻangá
ʻUhinga e Hala ʻo e Fuakavá
Ngaahi Konga Fakamatala
Ko e hā ʻa e hala ʻo e fuakavá? Ko e hala pē ia ʻe taha ʻoku fakatau ki he puleʻanga fakasilesitiale ʻo e ʻOtuá. ʻOku tau kamata he halá ʻi he matapā ʻo e papitaisó. …
ʻE lava ke pehē ʻe ha niʻihi, “Te u lava pē ke fakahoko ha ngaahi fili lelei neongo pe te u papitaiso pe ʻikai; ʻoku ʻikai fie maʻu ia ke u fakahoko ha ngaahi fuakava peá u toki hoko ko ha tokotaha lavameʻa.” … Ko e hā leva e faikehekehe ʻo e hala ʻo e fuakavá?
Ko hono moʻoní, ko ha faikehekehe makehe mo taʻengata ia. …
Ko e ʻuluakí, ko e natula ʻo ʻetau talangofua ki he ʻOtuá. Mahulu ange ʻi heʻetau maʻu pē ha ngaahi taumuʻa leleí, ʻoku tau tukupā fakamātoato ke moʻui ʻaki e lea kotoa pē ʻoku folofola ʻaki ʻe he ʻOtuá. ʻI heʻene peheé, ʻoku tau muimui ki he sīpinga ʻo Sīsū Kalaisí. …
Ko e tafaʻaki makehe ʻe taha ʻo e hala ʻo e fuakavá, ʻa hotau vā fetuʻutaki mo e Toluʻi ʻOtuá. ʻOku mahulu hake e ngaahi meʻa ʻoku fakahoko ʻe he ngaahi fuakava ʻoku fakahoko ʻe he ʻOtuá mo ʻEne fānaú, ʻi hono tataki pē kinautolú. ʻOku nau haʻi kitautolu kiate Ia. …
ʻOku tataki ai heni kitautolu ki he tāpuaki makehe hono tolu ʻo e hala ʻo e fuakavá. ʻOku tuku mai ʻe he ʻOtuá ha meʻafoaki taʻemafakamatalaʻi ke tokoni kiate kinautolu ʻoku fakahoko ha fuakavá ke nau hoko ko ha kakai tauhi fuakava: ʻa ia ko e meʻafoaki ʻo e Laumālie Māʻoniʻoní. …
Faá, ʻoku maʻu ʻe kinautolu ʻoku tulifua ki he hala ʻo e fuakavá ha ngaahi tāpuaki makehe ʻi ha ngaahi fakatahaʻanga fakalangi kehekehe kuo fokotuʻu [hangē ko e ngaahi houalotu sākalamēnití mo e moihū ʻi he temipalé]. …
Ko hono fakaʻosí, ʻoku toki maʻu pē e ngaahi tāpuaki ʻo ʻĒpalahame, ʻAisake, mo Sēkopé, ʻa e ngaahi tāpuaki fungani ʻo e fakamoʻuí mo e hākeakiʻí ʻa ia ʻoku ʻa e ʻOtuá pē taha ke Ne foakí, ʻi he taimi ʻoku tau tulifua ai ki he hala ʻo e fuakavá. …
Tuku ke tau tokanga ki he ui ʻa e palōfitá ke nofo maʻu ʻi he hala ʻo e fuakavá.