“Unsa ang Nabuhat sa Atong Manluluwas alang Kanato?,” Alang sa Kalig-on sa Kabatan-onan, Mayo 2021.
Priesthood nga Sesyon
Unsa ang Nabuhat sa Atong Manluluwas alang Kanato?
Mga Kinutlo
Unsa ang nabuhat ni Jesukirsto sa matag usa kanato? Nabuhat Niya ang tanan nga mahinungdanon alang sa atong panaw sa mortalidad ngadto sa padulngan nga gilatid diha sa plano sa atong Langitnong Amahan. Mamulong ako og upat sa labing importanting bahin niana nga plano. …
Ang Pagkabanhaw naghatag kanato sa panglantaw ug sa kalig-on nga molahutay sa mortal nga mga hagit nga giatubang sa matag usa kanato ug niadtong atong gihigugma. Kini naghatag kanato og usa ka bag-ong paagi sa pagtan-aw sa pisikal, mental, o emosyonal nga mga kakulangan nga anaa kanato sa atong pagkahimugso o naangkon sa panahon sa mortal nga kinabuhi. Kini naghatag kanato og kalig-on sa paglahutay sa mga kasub-anan, mga kapakyasan, ug mga kasagmuyo.
Ang Pagkabanhaw naghatag usab kanato og usa ka gamhanan nga pagdasig sa pagsunod sa mga sugo sa Dios panahon sa atong mortal nga kinabuhi. …
Ang atong Manluluwas ug Manunubos milahutay sa dili matukib nga pag-antus nga mahimong usa ka sakripisyo alang sa mga sala sa tanang mga tawo kinsa maghinulsol. Kining maulaon nga sakripisyo nagtanyag sa hilabihan ka maayo, ang putli nga kordero nga walay lama, alang sa hilabihan ka dautan, ang mga sala sa tibuok kalibutan. …
… Si Jesus mitudlo kanato sa plano sa kaluwasan. Kini nga plano naglakip sa Paglalang, ang katuyoan sa kinabuhi, ang panginahanglan sa oposisyon, ug sa gasa sa kabubut-on. Mitudlo usab siya kanato sa mga sugo ug mga pakigsaad nga kinahanglan natong tumanon ug mga ordinansa nga kinahanglan natong masinati aron sa pagdala kanato og balik ngadto sa atong langitnong mga ginikanan. …
Ang atong Manluluwas mibati ug nasayod sa atong mga tentasyon, atong mga panlimbasog, sa atong mga kasakit, ug sa atong mga pag-antus, kay Siya andam nga misinati niining tanan isip kabahin sa Iyang Pag-ula. … Ang tanang nag-antos sa bisan unsa nga matang sa mortal nga kahuyang kinahanglang mahinumdom nga ang atong Manluluwas nakasinati usab niining matang sa sakit, ug pinaagi sa Iyang Pag-ula, Siya nagtanyag sa matag usa kanato sa kalig-on aron mapas-an kini.