“Importanting mga Panag-istoryahay,” Alang sa Kalig-on sa mga Kabatan-onan, Mayo 2021.
Dominggo sa Buntag nga Sesyon
Importanting mga Panag-istoryahay
Mga Kinutlo
Dili kita makahulat alang sa pagkakabig nga mahitabo lamang ngadto sa atong mga anak. Ang wala damha nga pagkakabig dili baroganan sa ebanghelyo ni Jesukristo. Ang mahisama sa atong Manluluwas dili mahitabo sa sulagma nga paagi. Ang tinuyo nga pagmahal, pagtudlo, ug pagpamatuod makatabang sa mga bata sa pagsugod sa batan-ong edad nga mobati sa impluwensya sa Espiritu Santo. Ang Espiritu Santo importante ngadto sa pagpamatuod ug pagkakabig sa atong mga anak ngadto ni Jesukristo. …
Hunahunaa ang bili sa mga panag-istoryahay sa pamilya mahitungod sa ebanghelyo ni Jesukristo, importanting mga panag-istoryahay, nga makadapit sa Espiritu. Kon kita aduna niana nga panag-istoryahay uban sa atong mga anak, nagtabang kita kanila sa pagmugna og sukaranan, “nga mao ang tinuod nga tukuranan, usa ka tukuranan diin kon [sila] magtukod dili sila mapukan” [Helaman 5:12].
Kining importanting mga panaghisgot makagiya sa mga bata ngadto sa:
-
Pagsabot sa doktrina sa paghinulsol.
-
Pagbaton og hugot nga pagtuo diha ni Kristo, ang Anak sa buhing Dios.
-
Pagpili sa bunyag ug sa gasa sa Espiritu Santo kon walo ka tuig na ang panuigon.
-
Ug pag-ampo ug “paglakaw nga matarong diha sa atubangan sa Ginoo”[Doktrina ug mga Pakigsaad 68:28]. …
Samtang ang mga anak nagkat-on ug nag-uswag, ang ilang mga tinuohan pagahagiton. Apan ingon nga sila nasangkapan og husto, sila makatubo diha sa hugot nga pagtuo, kaisog, ug pagsalig, bisan taliwala sa kusog nga oposisyon.
Gitudlo ni Alma kanato ang “pag-andam sa mga hunahuna [sa] mga anak”[Alma 39:16]. Kita nag-andam sa nagtubo nga henerasyon nga mahimong umaabot nga mga tigpanalipod sa hugot nga pagtuo, sa pagsabot “nga [sila] gawasnon sa paglihok alang sa [ilang mga kaugalingon]––sa pagpili sa agianan sa walay katap[o]san nga kamatayon o sa agianan sa kinabuhi nga dayon” [2 Nephi 10:23]. Ang mga bata angay nga pasabton niining importanting kamatuoran: ang kahangtoran kinahanglan nga dili kita masayop.
Hinaot nga ang atong importante apan yano nga panag-istoryahay uban sa atong mga anak nagtabang kanila nga “motagamtam sa mga pulong sa kinabuhi nga dayon” karon, aron nga sila makapahimulos og “kinabuhi nga dayon sa kalib[o]tan nga moab[o]t, gani ang imortal nga himaya” [Moises 6:59; empasis gidugang].