“Makahimo Kamo sa Pagpundok sa Israel!,” Alang sa Kalig-on sa mga Kabatan-onan, Mayo 2021.
Priesthood nga Sesyon
Makahimo Kamo sa Pagpundok sa Israel!
Mga Kinutlo
Dul-an sa tulo ka tuig na ang milabay, si Presidente Russell M. Nelson midapit sa tanang kabatan-onan sa Ang Simbahan ni Jesukristo sa mga Santos sa Ulahing mga Adlaw nga “moapil sa grupo sa kabatan-onan sa Ginoo aron motabang sa pagpundok sa Israel” sa duha ka habig sa tabil. Miingon siya, “Kana nga panagpundok mao ang labing importanting butang nga nahitabo sa yuta karon” [“Paglaum sa Israel” (tibuok kalibotan nga debosyonal sa kabatan-onan, Hunyo 3, 2018), 8, HopeofIsrael.ChurchofJesusChrist.org]. Sigurado gayod ako nga kamong kabatan-onan makahimo niini—ug maayo kaayong mohimo niini—tungod sa (1) unsay anaa sa inyong pagkatawo ug (2) dakong gahom sulod kaninyo. …
… Sumala sa basahon sa Gipadayag, “may gubat didto sa langit”! [Pinadayag 12:7–8]. Si Satanas igmat nga milingla sa ikatulo nga bahin sa espiritung mga anak sa Langitnong Amahan nga siya ang ipatigbabaw imbis nga ang Dios. Apan dili kamo! Nakita ni Apostol Juan nga inyong nabuntog si Satanas “sa pulong sa [inyong] pagpanghimatuod.”… [Pinadayag 12:11].
…Ang pagkasayod nga inyong nabuntog si Satanas pinaagi sa pulong sa inyong pagpamatuod kaniadto motabang kaninyo sa paghigugma, pagpaambit, ug pagdapit karon ug sa kanunay—sa pagdapit sa uban nga moduol ug motan-aw, moduol ug motabang, ug moduol ug magpasakop, samtang kanang samang gubat alang sa mga kalag sa mga anak sa Dios nagpadayon. …
Ang programa sa Kabataan ug Kabatan-onan usa ka propetikanhong himan sa pagtabang kaninyo kabatan-onan nga mapaandar ang inyong dakong pagtuo. … Samtang kamo mga batan-on—mangulo—sa pagsunod sa ebanghelyo, pag-amuma sa uban, pagdapit sa tanan nga modawat sa ebanghelyo, paghiusa sa mga pamilya alang sa kahangturan, ug pag-organisar og makalingaw nga mga kalihokan, ang dakong pagtuo kang Kristo nga anaa kaninyo sa premortal nga kinabuhi motunga og balik ug mohatag kaninyo og gahom sa paghimo sa Iyang buhat niini nga kinabuhi!