Ko e Kaveingá mo Au

ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻo e Ongo Kaveinga ʻo e Kau Finemuí mo e Kōlomu ʻo e Lakanga Taulaʻeiki Faka-ʻĒloné

Ko Hono Ikunaʻi Hoku Vaivaiʻanga Lahi Tahá

“ʻOku ou mataʻikoloa ʻaki ʻa e meʻaʻofa ʻo e fakatomalá mo e feinga ke fakalakalaka ʻi he ʻaho takitahá.”

Fai ʻe ʻElina Pangikā

ʻI heʻeku kei siʻí, naʻá ku fekuki mo ha palopalema lahi ʻi heʻeku loi ki heʻeku ongomātuʻá. Naʻe kamata ia ko ha fehalaaki taʻe-halaia, ka ʻi he ngaahi taʻu kuo hilí naʻe tupulaki ia ki ha tōʻonga kovi ʻaupito.

Naʻá ku loi kiate kinaua ʻi he meimei ʻaho kotoa pē fekauʻaki mo e ngaahi meʻa maumau taimi tahá. Naʻe aʻu ki ha tuʻunga naʻe ʻikai ke na toe falala mai kiate au. Naʻa mo e taimi naʻá ku lea moʻoni aí, naʻe ʻikai ke na tui mai kiate au. Ne u ongoʻi ʻita ʻaupito. Naʻe feinga ʻeku faʻeé mo ʻeku tamaí ʻi he meʻa kotoa pē ke taʻofi ʻeku loí, ka naʻe ʻikai pē ke u lava ʻo taʻofi.

ʻI ha Sāpate ʻe taha he tuku ʻa e lotú, ne u tangutu hifo mo ʻeku ongomātuʻá ʻi heʻemau tēpile ʻi peitó. Naʻá na lau mai e folofola ʻa e Fakamoʻuí ʻi he ʻEta 12:27: “Pea kapau ʻe haʻu kiate au ʻa e tangatá te u fakahā kiate kinautolu ʻa honau vaivaí. ʻOku ou foaki ki he tangatá ʻa e vaivaí koeʻuhí ke nau loto-fakatōkilalo; pea ʻoku feʻunga ʻa ʻeku ʻofá ki he tangata kotoa pē ʻoku nau fakavaivaiʻi ʻa kinautolu ʻi hoku ʻaó, he kapau te nau fakavaivaiʻi ʻa kinautolu ʻi hoku ʻaó, pea tui kiate au, te u liliu ʻa e ngaahi meʻa vaivaí ko e mālohi kiate kinautolu.”

Kuo teʻeki ai ke u fanongo ʻi ha potufolofola mātuʻaki ongo moʻoni. Naʻá ku ako maʻuloto ia mo feinga ke tuku ke ne liliu hoku lotó.

ʻI ha ngaahi uike siʻi pē, hili ha ngaahi houa lahi ʻo e lotú, tangí, mo hono fakavaivaiʻi au ʻi he ʻao ʻo e ʻOtuá, naʻe ʻikai ke u toe fefaʻuhi mo e loí. Naʻá ku fakaʻatā ʻa e mālohi ʻo e Fakalelei ʻa Sīsū Kalaisí ke ngāue ʻi heʻeku moʻuí!

Talu mei he ʻaho ko iá ʻi he taʻu ʻe nima kuohilí, kuo teʻeki ke u loi tuʻo taha ki heʻeku ongomātuʻá. ʻOku ou laukau ʻaki ʻeku feingá. Naʻe faifai peá u fili ke fakatomala pea, ʻi he tokoni ʻa Kalaisí, ke u liliu. ʻOku ou ʻiloʻi moʻoni “ʻoku feʻunga ʻa e ʻaloʻofa ʻa Sīsū Kalaisí ki he tangata kotoa pē ʻoku nau fakavaivaiʻi ʻa kinautolu ʻi [Hono] ʻaó.”

Naʻe tokoniʻi au ʻe he aʻusia ko iá ke u maʻu ha fakamoʻoni lahi ange ki he Tohi ʻa Molomoná. ʻOku ou lava ʻo fakamoʻoni ʻoku moʻoni ʻa e ngaahi folofolá. ʻOku ou fakaafeʻi kimoutolu ke mou fekumi kia Kalaisi ʻo fakafou ʻi he folofolá.

ʻOku nofo ʻa e tokotaha naʻá ne faʻú ʻi Vēsīniá, USA.