“Fakamālohisino Fakatuʻasino mo Fakalaumālié,” Ki Hono Fakamālohia ʻo e Toʻu Tupú, ʻEpeleli 2022.
Ko e Kaveingá mo Au
ʻOku vahevahe ʻe he toʻu tupú ʻa e founga ʻoku nau moʻui ʻaki ai e ngaahi fakalea ʻa e Ongo Kaveinga ʻo e Kau Finemuí mo e Kōlomu ʻo e Lakanga Taulaʻeiki Faka-ʻĒloné
Fakamālohisino Fakatuʻasino mo Fakalaumālié
“ʻOku ou feinga ke tokoni, ngāue ʻaki ʻa e tuí, fakatomala, pea fakalakalaka ʻi he ʻaho takitaha.”
Laʻitā mei he Getty Images
Hili e uesia hoku ʻulú ʻi he vaʻinga ʻakapulu [faka-ʻAmeliká], naʻe kamata ke u langa ʻulu fakaʻaho. Naʻe faingataʻa ke ʻoua te u tokanga taha ki he mamahi ne u ongoʻí. ʻI he ʻaho ʻe taha naʻá ku ongoʻi ha ueʻi mei he Laumālie Māʻoniʻoní ʻoku ʻikai maʻu ʻa e fiefiá mei hotau ngaahi tūkungá kae mei he meʻa ʻoku tau tokanga taha ki aí. Naʻá ku fakatokangaʻi naʻe tukutaha maʻu pē ʻeku tokangá ki heʻeku mamahí kae ʻikai ko e ngaahi tāpuaki fakaʻaho ʻoku ou maʻu mei he ʻOtuá.
Naʻe kamata ke u fifili, pe ko e hā mo ha toe meʻa naʻá ne taʻofi au mei heʻeku tupulaki fakalaumālié? Naʻá ku fehuʻi loto fakatōkilalo ki he Tamai Hēvaní. Naʻá ku ʻiloʻi he ʻikai ke u lava ʻo maʻu ʻa e tali totonú ʻiate au pē, ka ʻoku maʻu ʻe heʻetau Tamai Hēvaní ʻa e ngaahi tali kotoa pē.
Naʻe ngali faingofua ʻaupito ʻa e tali naʻá ku maʻú, ka naʻe fakafeʻunga ia ki he meʻa naʻá ku fie maʻú: “Tuʻu hake mei he mohengá pea toe fakamālohisino.” Naʻe kamata ke u fakamālohisino neongo ʻa e mamahi taʻe-tuku naʻá ku ongoʻí. Naʻá ku fakatokangaʻi ne u ʻunu ʻo ofi ange ki he ʻOtuá.
ʻI heʻeku fakamālohisinó, ʻoku ʻikai ke u sio ki he olá ʻi he taimi pē ko iá. Ka ʻo kapau te u kei feinga pē, te u sio ki he liliú. ʻOku fakaʻaongaʻi e tefitoʻi moʻoni tatau ki he tupulaki fakalaumālié. ʻI heʻetau lau e folofolá, mahalo he ʻikai ke tau aʻusia ha liliu he taimi pē ko iá. Kapau ʻe hokohoko atu ʻetau lau e folofolá mo fai ha ngaahi fehuʻi ʻi he loto fakamātoato, te tau vakai ki ha faikehekehe ʻi he ngaahi tāpuaki ʻoku tau maʻú pea ʻi heʻetau tuí.
Kuo foaki mai ʻe he ʻOtuá ha ʻofa lahi kiate au. ʻI heʻeku fakatou fakamālohisino fakatuʻasino mo fakalaumālié, ʻoku ou toe ofi ange ai kiate Ia. ʻOku hoko ʻa e ofi ki he Tamai Hēvaní ko ʻeku fiemālie mo e ongoʻi nonga lahi tahá ia. ʻI hoʻo maʻu ʻa e sākalamēnití, ʻoku ou fakaafeʻi koe ke ke tokanga taha ki he tupulaki fakalaumālie te ke lava ʻo fakahoko ʻi he uike ka hoko maí. ʻE ʻoatu ʻe he Laumālie Māʻoniʻoní ʻa e fakahinohino fakataautaha ʻokú ke fie maʻú.
ʻOku nofo ʻa e taha naʻá ne faʻú ʻi Netaleni.