“Ko e Fakamoʻui ne Mamahí,” Ki Hono Fakamālohia ʻo e Toʻu Tupú, ʻEpeleli 2022.
ʻOtu Lea ki he ʻOtu Lea
Ko e Fakamoʻui ne Mamahí
ʻI ha taʻu ʻe laungeau kimuʻa pea hāʻele mai ʻa Sīsū Kalaisí, naʻe tomuʻa mamata mai ʻa ʻĪsaia ki Heʻene mamahí koeʻuhí ko ʻetau ngaahi angahalá.
fehiʻanekina pea liʻaki
ʻI he hāʻele mai ʻa Sīsū Kalaisi ki he māmaní, naʻe tui ha kakai ʻe niʻihi kiate Ia, ka ko e tokolahi tahá naʻe ʻikai ke nau tui. Naʻe aʻu ʻo nau sio lalo kiate Ia, pea naʻe fehiʻa e tokolahi kiate Ia. ʻI he ikuʻangá, naʻe fili e kakaí ke fakamamahiʻi pea tāmateʻi Ia. (Vakai 1 Nīfai 19:9.)
kuó ne toʻo kiate ia ʻa ʻetau ngaahi mamahí
Naʻe toʻo ʻe Sīsū Kalaisi kiate Ia ʻa ʻetau ngaahi mamahí, mahakí, mo e vaivaí kotoa. Naʻá Ne fai ʻeni koeʻuhí ke Ne ʻaloʻofa mai kiate kitautolu mo ʻafioʻi e founga ke tokoniʻi ai kitautolú. (Vakai, ʻAlamā 7:11–13.)
naʻe lavea ia koeʻuhí ko ʻetau ngaahi angahalá
Naʻe mamahi ʻa Sīsū Kalaisi koeʻuhí ko ʻetau ngaahi angahalá. Naʻá Ne fai ʻeni koeʻuhí ke lava ʻo fakamolemoleʻi kitautolu ʻi heʻetau fakatomalá. (Vakai, Tokāteline mo e Ngaahi Fuakava 18:11; 19:15–19.)
ʻi hono ngaahi taá ʻoku tau moʻui ai
Ko “Hono ngaahi taá” ʻa Hono ngaahi kafó. ʻOku fakafofongaʻi ʻe he ngaahi meʻá ni ʻa e mamahi kotoa naʻá Ne kātekina maʻatautolú, kau ai hono lilingi Hono taʻataʻá mo ʻEne pekiá. Koeʻuhí naʻe mamahi ʻa Sīsū Kalaisi maʻatautolu, ʻe lava ke toe fakamoʻui kitautolu. ʻOku fakaʻatā ʻe Heʻene feilaulaú ke fakamolemoleʻi ʻetau ngaahi angahalá. ʻI heʻetau fakatomala mo feinga ke tauhi ʻetau ngaahi fuakavá, ʻokú Ne fakamoʻui mo liliu kitautolu. (Vakai, Mōsaia 3:7–11; Ngaahi Tefito ʻo e Tui 1:3.)