“Lotu ʻi he Vaitafe Momokó,” Ki Hono Fakamālohia ʻo e Toʻu Tupú, ʻEpeleli 2022.
Ngaahi Makatuʻunga Mālohí
Lotu ʻi he Vaitafe Momokó
Tā fakatātā ʻa Corey Egbert
Lolotonga ha kemi mo homa ongo fāmilí, naʻá ku ʻave mo hoku kaungāmeʻa ko Peilí ha ongo kiʻi pōpao ki he vaitafé. Naʻe lahi ʻeku akoako ʻaʻaló, ka naʻe teʻeki ai ke fakahoko tuʻo taha ia ʻe Peili. Hili ʻeku akoʻi ange ʻa e ngaahi meʻa mahuʻingá, naʻá ma fakamaʻu homa sāketi fakahaofi moʻuí peá ma heka ki heʻema pōpaó.
Ko ha faʻahitaʻu failau momoko ia, pea naʻe mokoʻīʻī ʻa e vaí. Naʻá ma ʻaʻalo holo pē mo ʻeku fanongo ki ha pālutu ʻi he vaí. Naʻá ku sio ki mui peá u sio ki he takele ʻo e pōpao lanu mata maama ʻa Peilí. Naʻe kamata ke u hohaʻa. Naʻá ku lotua ke ne toe ʻasi hake.
Ne faifai pea ʻasi hake ʻa Peili, ʻo fakatau ʻene mānavá. Meʻamālié, naʻe mamaha feʻunga ʻa e vaí ke ne lava pē ʻo tuʻu. Ka naʻá ne kei faingataʻaʻia pē ʻi hono fulihi ʻene pōpaó. Naʻá ku feinga ke tokoni kiate ia, ka naʻe faingataʻa ʻi heʻeku kei heka ʻi heʻeku pōpaó.
Naʻe talamai ʻe Peili naʻe ongonoa hono ongo vaʻé. Naʻe kamata ke ne hohaʻa. Naʻe ueʻi au ke fai haʻama lotu. Hili pē hono lotua ke maluʻi mo tataki kimauá, naʻá ku ongoʻi fiemālie; naʻá ku ʻiloʻi te ma sai pē.
Naʻá ku hifo ki he loto vai momokó. Naʻá ku tokoni kia Peili ke heka ki heʻeku pōpaó pea fulihi hake ʻene pōpaó. Naʻá ku puke ʻa e kiato ‘o e ongo pōpaó ʻo toho atu ʻi he vai kelé ki ʻuta.
ʻOku ou houngaʻia naʻe akoʻi au ʻe heʻeku ongomātuʻá ke u lotu maʻu pē, tautautefito ʻi he ngaahi tūkunga faingataʻá. Naʻe tataki au ʻe heʻeku lotú ke u tokoni ki hoku kaungāmeʻa faingataʻaʻiá.
Ko e taimi ʻe niʻihi ʻoku tau ʻalu ki he lotú pea ʻikai ke tau tokanga. Pe ko ʻetau lau e folofolá pea ongoʻi ʻoku ʻikai kaunga mai ia kiate kitautolu. Ka ʻi he taimi ʻoku hoko mai ai ʻa e faingataʻá pea ʻahiʻahiʻi ʻetau tuí, ʻe lava ke faitāpuekina kitautolu ʻe he ngaahi meʻa faingofua ʻoku akoʻi maí.
ʻAtaline L., Motu ko Pilinisi ʻEtuaté, Kānata