“Ko Sīsū Kalaisi Ho Fakamoʻuí,” Ki Hono Fakamālohia ʻo e Toʻu Tupú, ʻEpeleli 2022.
Ko Sīsū Kalaisi Ho Fakamoʻuí
Ko e Fakalelei ʻa Sīsū Kalaisí maʻau.
ʻOkú Ne Moʻui, tā ʻe Simon Dewey
“ʻOku ʻikai ʻi heni ia: he kuo toe tuʻu” (Mātiu 28:6).
Ko e niʻihi ʻeni ʻo e ngaahi lea ʻuhingamālie taha ʻi he folofolá. Naʻe lea ʻaki ia ʻe ha kau ʻāngelo ofi ki ha ngeʻesi fonualoto. Naʻa nau fakahā kuo ikunaʻi ʻe he ʻEiki ko Sīsū Kalaisí ʻa e angahalá mo e maté ʻo fakafou ʻi Heʻene Fakaleleí, ʻo fakaʻosi ʻaki ʻEne Toetuʻu nāunauʻiá.
ʻOku ou loto ke ke ʻiloʻi ko e Fakalelei ʻa Sīsū Kalaisí maʻau! Ko e misiona ʻo ʻEne moʻuí maʻau! Naʻe fakataumuʻa maʻau ʻEne feilaulau ʻi he pekiá! Pea ko ʻEne Toetuʻú maʻau! ʻE faingofua he taimi ʻe niʻihi ke ongoʻi naʻe fakahoko kotoa ʻeni ʻe Sīsū Kalaisi maʻá ha taha kehe. Ka ʻoku ou fakamoʻoni naʻá Ne fakahoko ia maʻau.
Ko e pōpoaki ʻeni ʻo e ʻuluaki pongipongi Toetuʻú: Naʻe ʻofa pehē ʻa e ʻOtuá ki māmani naʻá Ne foaki Hono ʻAlo pē Taha naʻe Fakatupú ke tokoniʻi kitautolu. Pea naʻe foaki ʻe Hono ʻAlo ko Sīsū Kalaisí ʻa ʻEne moʻuí maʻatautolu.
ʻOku kaunga e feilaulau ʻa Sīsū Kalaisí ki he māmaní fakakātoa—kau ai koe.
Tomuʻa Kikiteʻí mo e Fakamelomeló
Talu mei he kamataʻangá mo hono akoʻi ʻe he ʻOtuá ʻa e kakaí fekauʻaki mo e Fakamoʻuí. Naʻá Ne fekauʻi ha ʻāngelo ke fakahinohinoʻi ʻa ʻĀtama mo ʻIvi, “Ke ke fai ʻa e meʻa kotoa pē ʻokú ke faí ʻi he huafa ʻo e ʻAló, peá ke ke fakatomala, pea ui ki he ʻOtuá ʻi he huafa ʻo e ʻAló ʻo fai atu maʻu ai pē” (Mōsese 5:8). Talu mei he ʻaho ko iá ʻo aʻu ki he kuonga ʻo Sīsū Kalaisí, naʻe feilaulauʻi ʻe he kakaí ʻa e fanga monumanú ke tokoni ke nau hanganaki atu ki he feilaulau ko ia ʻe fakahoko ʻe he ʻAlo ʻo e ʻOtuá kimui angé.
ʻIkai ngata aí, ka naʻe tomuʻa kikiteʻi fuoloa pē ʻa e Fakalelei ʻa Sīsū Kalaisí kimuʻa pea ʻaloʻi Ia ʻi Pētelihemá. Naʻe kikiteʻi ia ʻe he kau palōfitá ʻi ha lauʻi toʻu tangata lahi.
Ko ʻEne Fakalelei Taʻe-fakangatangatá mo e Toetuʻú
He ʻikai lava ke mahino moʻoni kiate kitautolu ʻa e meʻa kotoa pē naʻe fakahoko ʻe Sīsū Kalaisi maʻatautolú. He ʻikai ke tau lava ʻo maʻu ha mahino ki he lahi ʻo ʻEne mamahí mo e lahi fau e ngaahi ola ʻo ʻEne feilaulaú. Ka te ke lava ʻo ongoʻi ʻa e ola ʻo ʻEne Fakaleleí he ʻaho kotoa pē.
ʻI Ketisemani pea ʻi he kolosí, naʻá Ne “kātakiʻi ai ʻa e mamahi ʻa e kakai kotoa pē, koeʻuhí ke [nau] lava … ʻo fakatomala pea haʻu kiate ia” (Tokāteline mo e Ngaahi Fuakava 18:11). Naʻá Ne toʻo kiate Ia ʻa e mamafa ʻo e ngaahi angahala ʻa e kakai kotoa pē. Naʻe fakatupu ʻe hono fuesia ha kavenga mafasia peheé ke tafe ʻa e totó ʻi he ava kotoa ʻo Hono kilí (vakai, Luke 22:44; Tokāteline mo e Ngaahi Fuakava 19:18).
Naʻe tā pea haha Ia kimui ange. Naʻe ʻai ha kalauni talatala māsila ki Hono ʻulú. Naʻe fakamālohiʻi leva ke Ne fua Hono kolosí ki Kalevale, ʻa ia naʻe fakakakato ai ʻa e mamahi ʻo e Fakaleleí ʻi hono tutuki Ia ki he kolosí pea mamahiʻia ʻi he mamahi taʻe-mafakamatalaʻí. Naʻá Ne fakahoko e finangalo ʻo ʻEne Tamaí. Naʻá Ne mamahi pea tukuange ʻEne moʻuí.
Ko e Tutukí, tā ʻe Harry Anderson
Hangē pē ko ia naʻá Ne tomuʻa kikiteʻi mo ʻEne kau palōfitá, naʻá Ne toe tuʻu mei he faʻitoká ʻi he ʻaho hono tolú. Ko Ia naʻe fuofua toetuʻú. Koeʻuhí ko Ia, ʻe maʻu ʻe kinautolu kotoa pē kuo moʻuí ʻa e meʻaʻofa ʻo e toetuʻú. Fakafetaʻi kiate Ia, ʻe fakafoki e sino kotoa pē ki hono tuʻunga haohaoá.
Naʻe totongi huhuʻi ʻe he Fakamoʻuí ʻetau ngaahi angahalá mo e maumaufonó. Koeʻuhí ko Ia, ʻe lava ke huhuʻi ʻa e kakai kotoa pē mei he angahalá—ʻo kapau te nau fakatomala.
Naʻe taʻe-fakangatangata e Fakalelei ʻa Sīsū Kalaisí. Naʻá Ne fakahaofi e faʻahinga kotoa pē ʻo e tangatá mei he maté. Naʻá Ne mamahi lahi ʻaupito, ʻo mahulu hake ia ʻi he mamahi ʻe malava ke aʻusia ʻe ha taha fakamatelie. Naʻá Ne mamahi maʻá e kakai kotoa pē naʻe ʻi he ngaahi māmani taʻe-faʻalaua naʻá Ne faʻú (vakai, Tokāteline mo e Ngaahi Fuakava 76:24; Mōsese 1:33).
Ko Sīsū toko taha pē te Ne lava ʻo foaki ha faʻahinga Fakalelei taʻe-fakangatangata pehē, koeʻuhí naʻe ʻaloʻi Ia ʻe ha faʻē matelie mo ha Tamai taʻe-faʻa-mate. Naʻe hoko ai ʻa Sīsū ko ha Tokotaha taʻe-fakangatangata—ko e tokotaha pē ia naʻe lava ʻo fili ke tuku hifo ʻEne moʻuí pea toe maʻu iá (vakai, Sione 10:14–18). Naʻe hoko foki e moʻui haohaoa ʻa e Fakamoʻuí ko ha tuʻunga mahuʻinga ia ke Ne lava ai ʻo fakakakato e ngaahi fiemaʻu ʻa e fakamaau totonú maʻatautolú (vakai, ʻAlamā 34:8–14).
ʻOku hanga ʻe Hono misiona ʻi he māmaní—ʻa ia ʻoku kau ai ʻEne feilaulau Fakaleleí mo ʻEne Toetuʻu mei he maté—ʻo ʻomi kiate kitautolu takitaha ʻa e ngaahi faingamālie ke huhuʻi mei he angahalá pea mo ha toetuʻu nāunauʻia! He ʻikai lava ʻo fua tautau hotau moʻua kiate Iá.
Taʻe-fakangatangata mo Fakataautaha Fakatouʻosi
ʻOku taʻe-fakangatangata e Fakalelei ʻa Sīsū Kalaisí. Ka naʻe fakataautaha foki ia. Makehe mei he ʻofa haohaoa naʻá Ne maʻu ki Heʻene Tamaí, naʻe fakaʻaiʻai foki Ia ʻe Heʻene ʻofa ki he fānau takitaha ʻa e Tamai Hēvaní. Pea ʻoku faitāpuekina kitautolu takitaha ʻe Heʻene Fakaleleí ʻi ha founga mātuʻaki fakataautaha. Lau fakalelei ʻa e fakamatala ko ʻeni mei he Fakamoʻuí:
“He vakai, ko au ko e ʻOtuá, kuó u kātakiʻi ʻa e ngaahi meʻá ni maʻá e kakai kotoa pē, koeʻuhí ke ʻoua naʻa nau mamahi ʻo kapau te nau fakatomala;
“Ka ʻo kapau ʻe ʻikai te nau fakatomala kuo pau ke nau mamahi ʻo hangē pē ko aú;
“ʻA ia ko e mamahi naʻe langaki ai ʻa ʻeku tetetete ʻaʻaku, ʻa ia ko e ʻOtuá, ko e tokotaha ʻoku mālohi tahá, koeʻuhí ko e mamahí, pea mo e tafe ʻa e totó ʻi he ava kotoa ʻo hoku kilí, mo e mamahiʻia ʻi he sinó mo e laumālié fakatouʻosi—peá u loto ke ʻoua naʻá ku inu ʻi he ipu mahí, peá u holomui ai—
“Ka neongo iá, kae tuku ʻa e lāngilangí ki he Tamaí, pea naʻá ku inu ai ʻo fakaʻosi ʻa ʻeku ngaahi teuteu ki he fānau ʻa e tangatá” (Tokāteline mo e Ngaahi Fuakava 19:16–19).
Naʻe mamahi lahi ʻa Sīsū koeʻuhí he ʻokú Ne ʻofa lahi ʻiate koe! ʻOkú Ne finangalo ke ke fakatomala pea ului koeʻuhí ke Ne lava ʻo fakamoʻui fakaʻaufuli koe.
Ko e Fakalelei ʻa Sīsū Kalaisí maʻau. Naʻá Ne toʻo kiate Ia ‘a hoʻo ngaahi angahalá. Naʻá Ne totongi huhuʻi hoʻo ngaahi angahalá kae lava ke ke fakatomala. ʻOkú Ne ʻoatu e mālohi ke ke ikunaʻi e faingataʻa kotoa pē te ke fehangahangai mo iá. ʻOkú ke maʻu e mālohi ko iá ʻi hoʻo tuí, falalá, mo e vilitaki ke muimui kiate Iá.
ʻI hoʻo lotu mo ako mo ha taumuʻá, te ke lava ai ʻo ako e founga ʻoku tāpuekina ai koe ʻe Hono misioná. Pea ʻe lava ʻe he Laumālie Māʻoniʻoní ʻo akoʻi mo fakamoʻoniʻi atu kiate koe ʻa e mahuʻinga taʻengata ʻo ʻEne Fakaleleí.
ʻOku ou fakafetaʻi ki he ʻOtuá koeʻuhí ko Hono ʻAlo ko Sīsū Kalaisí. Ko Ia “ko e toetuʻú, mo e moʻuí” (Sione 11:25). ʻOkú Ne moʻui. ʻOku ou ʻofa kiate Ia ʻaki hoku lotó kotoa, pea ʻoku ou fakamoʻoni kiate Ia. ʻOku ou fakamoʻoni ko e ʻAlo Ia ʻo e ʻOtua moʻuí. Ko Sīsū ʻa e Kalaisí—ko hotau Fakamoʻuí mo e Huhuʻí.