Fakamanatu ke Moʻui Maʻá

ʻĪmisi

nima ʻokú ne pukepuke ha foʻi mama

Tā fakatātā ʻa Corey Egbert

Ko e tokolahi taha ʻo e kakai ʻi hoku ʻapiakó ʻoku ʻikai ke mau tuʻunga moʻui tatau. ʻE lava ke mātuʻaki faingataʻa he taimi ʻe niʻihi. Ko e tokolahi ʻo hoku ngaahi kaungāmeʻá ʻoku nau lea kovi mo vala taʻetaau. Naʻe ʻi ai ha ngaahi taimi naʻá ku ʻalu ai mo kinautolu ʻo fai ha ngaahi fili ʻoku ʻikai ke u laukau ʻaki.

Pea ʻi he Kilisimasí ne foaki mai ʻe heʻeku faʻeé ha meʻa naʻá ne ui ko e foʻi mama moʻui maʻá. Naʻá ne talamai ʻe lava ke tokoni ʻa e foʻi mamá ke fakamanatu mai kiate au ke u muimui ki he Fakamoʻuí pea ke maʻa ʻeku ngaahi fakakaukaú mo e angafaí. Naʻá ku tui ia pea ne u fakakaukau ke u liliu. Naʻe kamata ke u toe tokanga ange ki he ngaahi lea naʻá ku fakaʻaongaʻí mo e anga ʻeku teuteú. Naʻá ku lau ʻeku folofolá pea faʻa ʻalu ki he seminelí. Pea naʻá ku feinga mālohi ange ke hoko ko ha faʻifaʻitakiʻanga ki hoku ngaahi kaungāmeʻá.

Naʻe faʻa fehuʻi mai ʻe he kakai ʻi he akó fekauʻaki mo hoku foʻi mamá. Naʻá ku ongoʻi laulaunoaʻia ʻi hono fakamatalaʻi ia he kamatá, ka kuo kamata ke u ongoʻi loto-falala ʻi he lahi ange ʻeku talanoa ki heʻeku ngaahi tuʻunga moʻuí. Kuo teʻeki ai ke u teitei vete hoku foʻi mamá, pea ʻoku ou fakapapauʻi ʻoku ʻiloʻi ia ʻe he kakaí ʻoku ʻaʻaku ia. Kuo tokolahi ange hoku ngaahi kaungāmeʻa ʻoku kamata ke nau tanganeʻia ʻiate au koeʻuhí kuo nau fakatokangaʻi ʻa ʻeku liliú.

ʻOku tokoni ʻeku vakai ki hoku kiʻi foʻi mamá ke u foki ai ki he hala hangatonu mo fāsiʻí, manatuʻi ʻa e Fakamoʻuí, pea hoko ko ha tokotaha te u lava ʻo laukau ʻaki. ʻOku ou ʻiloʻi ʻe ʻiate kitautolu ʻa e ʻEikí pea ʻoku tau lava ʻo ongoʻi ʻEne ʻi aí ʻi heʻetau moʻui ʻaki ʻa e ongoongoleleí, tauhi ʻetau ngaahi tuʻunga moʻuí, mo faifeinga ke moʻui maʻa ange ʻi he ʻaho takitaha.

Sesi L., Mīsuli, USA