“Te u maʻu fēfē nai ʻa e ʻfiefia ʻi he fonongáʼ lolotonga ʻene ngali fuʻu faingataʻá?,” Ki Hono Fakamālohia ʻo e Toʻu Tupú, ʻEpeleli 2022.
Ngaahi Fehuʻi mo e Talí
“Te u maʻu fēfē nai ʻa e ʻfiefia ʻi he fonongáʼ lolotonga ʻene ngali fuʻu faingataʻá?”
Manatuʻi e Meʻa ʻOkú ne Fakaʻaiʻai Koé
“ʻOku faingataʻa he taimi ʻe niʻihi ke maʻu ha meʻa ke fakaʻaiʻai kita. Ke tokoniʻi kitautolu, te tau lava ʻo manatuʻi e meʻa ʻokú ne fakalotolahiʻi kitautolu ke laka ki muʻá, hangē ko hotau ngaahi fāmilí mo ʻetau ngaahi taumuʻa fakataautaha mo fakalaumālié. Te tau lava ʻo maʻu ʻa e loto falala ʻe ʻi ai pē taimi ʻe faingofua ange ai ʻa e fonongá. ʻE tokoni ʻa e ngaahi fakafeʻātungia ʻoku tau fepaki mo iá ke tau tupulaki ai.”
Kalimei R., 17, Mekisikou
ʻOku ʻOmi ʻe he Fakamoʻoní ʻa e Nongá
“Kuó u fakafalala lahi he taʻu ko ʻeni ne toki ʻosí ki heʻeku fakamoʻoni ki he Tohi ʻa Molomoná mo e Siasi kuo fakafoki maí. Mei he mahaki fakaʻauha fakamāmani lahí ʻo aʻu ki he mālōlō ʻeku tamaí, ʻoku ou ʻilo ʻoku ʻi ai ʻa e ʻOtuá pea mo ha palani. Kuo tokoni hono ʻiloʻi ʻoku moʻoni ʻa e ongoongoleleí ke u maʻu ha nonga lolotonga hono ʻākilotoa au ʻe he ngaahi matangi mālohi ʻo e moʻuí.”
ʻĪfoni G., 17, ʻIutā, USA
Tafoki kiate Kinautolu ʻOkú ke Falala Ki Aí
“Kuo pau ke tau falala ki he ʻOtuá mo Sīsū Kalaisi. Te tau lava ʻo ongoʻi ʻa e fiefiá, he ʻokú Na ʻiate kitautolu maʻu pē. Te Na tokoni mai ke tau fai ʻa e meʻa ʻoku totonú neongo kapau ʻoku faingataʻa. ʻOku tau faingataʻaʻia kotoa pē, ka ʻoku ʻi ai foki mo ha kakai te tau lava ʻo falala ki ai ke tokoniʻi kitautolu, ʻo hangē ko ʻetau mātuʻá mo e kau takí.”
Keiki O., 16, mo Keilani O., 14, Potukali
Manatuʻi Ko Hai Koe
“ʻI he taimi ʻoku ou ongoʻi ai he ʻikai ke u toe lava ʻo hoko atú, ʻoku ou kiʻi tuʻu ʻo fakakaukau ki he maʻongoʻonga ʻo e Tamai Hēvaní. ʻOku tokoni hono manatuʻi ko e ʻofefine au ʻo ha ʻOtua māfimafí ke u ʻiloʻi hoku tuʻunga malava fakalangí mo fakalotolahiʻi au ke u hokohoko atu.”
Sōlini M., 15, Palāsila
Maʻu ha Ivi ʻi he Ngaahi Meʻa Fakaʻahó
“ʻOku fie maʻu ke tau loto-toʻa lolotonga e ngaahi taimi faingataʻá. ʻOku faingataʻa ʻa e feinga ke loto-toʻá, ka ʻoku faingofua ange ʻi he taimi ʻoku ou fai ai ʻa e ngaahi meʻa fakaʻaho ʻoku mahuʻinga tahá, hangē ko e lau folofolá mo e lotú. ʻI he taimi ʻoku ou fakahoko ai ha ngaahi lotu ʻoku mahuʻingamālié, ʻoku ou ongoʻi ʻa e mālohi mo e loto fakapapau ke fai ʻa e meʻa ʻoku totonú.”
ʻEmelī H., 16, Kānata
Muimui ki he Laumālié ʻi he ʻAho Takitaha
“ʻOku ou faʻa fehuʻi loto pē foki e fehuʻi ko ʻení. Ka ʻi heʻetau sio ki he Fakamoʻuí ʻi he meʻa kotoa pē ʻoku tau faí, te tau lava ʻo maʻu ʻa e fiefia mo e nēkeneka ʻi he moʻuí ni neongo ʻa e meʻa ʻoku tau fouá. Ako ke muimui ki he leʻo ʻo e Laumālié ʻi he ʻaho takitaha, pea te ke maʻu ʻa e fiefia moʻoní ʻi he moʻuí.”
Pauline K., 17, Fisi