ʻAi Hangatonu

ʻOku ʻuhinga ki he hā ʻa e “ʻoua naʻa maʻu mo ha ʻotua kehe”?

ko e hā ʻa e ʻEikí kia Mōsesé

Ko e Hā ʻa e ʻEikí kia Mōsesé, tā ʻe Wilson J. Ong

Naʻe folofola ʻa Sīsū Kalaisi “ko e ʻuluaki pea ko e lahi ʻo e fekaú” ke “ʻofa ki [he ʻEikí] ko ho ʻOtuá ʻaki ho laumālié kotoa, mo hoʻo moʻuí kotoa, mo ho lotó kotoa” (Mātiu 22:37–38). ʻOku ʻuhinga e konga ʻo e meʻá ni ke “ʻoua naʻá ke maʻu mo ha ʻotua kehe ʻi [Hono] ʻaó” (ʻEkesōtosi 20:3).

Naʻe ʻikai finangalo ʻa e ʻEikí ke foaki ʻe Hono kakaí honau lotó, laumālié, mo e ʻatamaí ki ha faʻahinga meʻa pē ʻo muʻomuʻa ʻiate Ia. Naʻá Ne fakatokanga kiate kinautolu ʻe lava ʻe he koloá, ngaahi kaungāmeʻá, mo kinautolu ʻoku nau malí ʻo tohoakiʻi ʻenau tokangá meiate Ia (vakai, Teutalōnome 7:3–6; 8:11–14; 13:6). ʻOku finangalo ʻa e ʻEikí ke Ne tataki ʻa e ngaahi fakakaukau, ngaahi holi, mo e ngaahi ngāue ʻa Hono kakaí. ʻOkú Ne ʻafioʻi ʻe tokoni ʻeni ke tau maʻu ʻa e fiefia lahi tahá.

Kuo fakatokanga mai e kau palōfitá he kuongá ni fekauʻaki mo e “ngaahi ʻotua loí.” Hangē ko ʻení, naʻe pehē ʻe Palesiteni Tāleni H. ʻOakesi, ko e Tokoni ʻUluaki ʻi he Kau Palesitenisī ʻUluakí:

“Ko e hā ha ngaahi meʻa kehe ʻoku tau fakamuʻomuʻa pea tau ʻtauhiʼ ʻo fakamuʻomuʻa ʻi he ʻOtuá … ? Fakakaukau ki he ngaahi meʻá ni, ʻoku tau maheni kotoa mo kinautolu:

• Ngaahi tukufakaholo fakafonua pe fakafāmili.

• Tonu fakapolitikalé.

• Ngāue maʻuʻanga moʻuí.

• Koloa fakamatelié.

• Fekumi ki he fiefia fakamāmaní.

• Mālohí, tuʻungá, mo e ongoongoá” (Konifelenisi lahi ʻOkatopa 2013 [Ensign pe Liahona, Nōvema 2013, 72]).