“Rongorongo ae Anaaki—Rongorongon te Kaunganano,” Ibukin Kakorakoraia Kairake, Nobembwa. 2022.
Rongorongon te Kaunganano
Anaaki
N aron are e tuangai tinau ngke I ngurengure n aron matoatoan te bwai teuana, “Oo, Hal, eng e bon matoatoa. Ma e bon riai n riki n arona anne. Te Maiu aei bon te tai ni kataaki”
E kona n taekinna ma te karaurau, ma te moangare, bukina bwa uoua bwaai aika e atai. E ngae ngke e rinanon te kangaanga, ma e kakawaki irouna bwa e na okira mweengana ni maeka ma Tamana are i Karawa. Ao e ataia ae e kona ni karaoia rinanon ana onimaki iroun te Tia Kamaiu. …
Rongorongon ana kaunganano are e katikui ibukira a kabwarabwaraaki inanon Moronaai 7, are e kaungaa iai natina Moomon te mwaane ae Moronaai ma ana botannaomata.…
E moanibwaia Iesu Kristo, n aron ake a karaoia naake a bane n nakoraoi n anga te kaunganano nakoia ake a kekeiaki ni karokoia ni mweengaia i karawa. …
E noora te nimamannei Moomon bwa kaotan korakoran aia onimaki. …
E kaungaia imwiina Moomon man kakoauaana ae iaon kawaia ni karekei bwaintangira mai nanoia ma ana tangira Kristo ae itiaki. …
Iangoan taai aika nako, I kona n noria ngkai bwa te bwaintangira n te tangira ae kororaoi anne—ana tangira ae itiaki Kristo—ni kakorakora, ni kairiiri, ni kamatoaia, ao ni bita tinau n ana kekeiaki ni kawaina nakon mweengana. …
… E atai ni kabane am kangaanga te Tia Kamaiu. E ata aron am konabwai n rikirake inanon te onimaki, am kantaninga, ao am tangira ae kororaoi.
Tuua ao berita aika tabu aika E anganiko bon tiaki kataakim ibukin babairean arom. Bon bwaai n tituaraoi aika a na uotiko rake ni karekean ana bwaintituaraoi ni kabane te Atua ao n okiran mweengaia Tamam are i Karawa ao te Uea, aika a tangirko.