“Te Rongorongo ae Kaeweaki—Te Reitaki ma te Uea,” Ibukin Kakorakoraia Kairake, Nobbembwa. 2022.
Te Reitaki ma te Uea
Te Rongorongo ae Kaeweaki
Ana euangkerio Iesu Kristo ae kaokaki e tataekina te rongorongo ae te reitaki i marenan te mwawane ma te aine, n te maiu aei ao n te maiu ae akea tokina. E ngae ngke e okoro aroaron ma taben te aine ao te mwawane, ma bon titebo kakawakin tibwangaia n ana babaire te Atua ae kakukurei ibukiia Natina. …
… Ni kaeineti ma ana reirei te euangkerio, te okoro i marenan te aine ao te mmwane e bon aki rietata riki nakon ana berita aika tabu te Atua nakoia Natina mmwane ma aine. Akea te aomata ae raka ana konabwai ni karekea mimitongin te Teretio nakon raona. Boni Iesu are e kaoira ni bane, ngaira natin te Atua, “bwa ti na nakoina, ni katoonga Raoiroina, ao E aki totokoa te aomata ane e nakoina.” [2 Nibwaai 26:33]. Ngaia are, n ae nanonaki ikai, bon tii te arona taraakira i Rouna.
Ngkana a oota taanga ao ni katiteuanaaki n te reirei aei, e toki irouia te kani beretitenti ke te kauouman beretitenti n aia utu. Bon akea ae rietata ke ae rinano n te reitaki n taanga, ao akea ae rimoa ke ae tiku. A uaia ni mwananga, bwa rao aika boraoi aroia, bwa natin te Atua. A karekea teuana te iango, nano, ao te kantaninga ma Tamara i Karawa ao Iesu Kristo,n kaira man bweena te utu.