Sokumuni Yani Vakavinaka i Vale
Veitikina lavetaki
Na Tama ni yaloda e gadreva mera vakasokumuni yani vakavinaka i vale na Luvena. …
O ira era ciqoma na kosipeli i Jisu Karisito se cava ga na kawa era vu mai kina, era sa tiki kei Isireli sa sokumuni mai. Ena vakasokumuni vata oya kei na levu ni valetabu era sa tara ka kacivaki me ra tara, eda sa toka kina ena dua na itokatoka duatani me da vakasokumuni Isireli ena yasa ruarua ni ilati me vaka e se bera vakadua ni bau yaco ena ituvatuva nei Tamada. …
… Eda vakavinavinaka ni da sa vakarabailevutaka tiko na daukaulotu kei keda na lewenilotu na noda sasaga ni sokumuni vata o Isireli sa veiseyaki tu. … Ia, na noda yalodina me ia na veilomani, veiwasei, kei na veisureti e rawa ni vakarabailevutaki sara vakalevu.
E dua na tiki yaga sara ni sasaga ni kaulotu oqo sai koya me yaco na lewenilotu yadua me ivakaraitaki ni bikeni caudre ena vanua cava ga eda tiko kina. E sega ni rawa ni da vakamatavulo tu me da rairai tatauvata kei na veika e yaco wavoliti keda. Na noda ivakaraitaki Vakarisito ni yalovinaka, buladodonu, mamarau, kei na loloma dina ena vuku ni tamata kecega e rawa ni vakavuna sega walega ni dua na rarama veituberi ni dua na bikeni ena vukudra ia na kila talega ni dua na toba taqomaki ena veicakacaka vakalotu ni veivakabulai kei na bula vakacerecerei ena kosipeli vakalesui mai i Jisu Karisito. …
Eda rokova na galala ni digidigi. Ena vuravura vakayago oqo, e vuqa era na sega ni rogoca se vakaitavi ena vakasokumuni kei Isireli. Ia e vuqa era na rogoca, sa namaka na Turaga vei ira era sa ciqoma na Nona kosipeli me ra segata vagumatua me ra cina ni bikeni ka na vukei ira tale eso me ra lako mai vua na Kalou. Oqo ena rawa kina vei ira na tacida kei na ganeda e vuravura taucoko me ra marautaka na veivakalougatataki cecere kei na cakacaka vakalotu ni kosipeli vakalesui mai i Jisu Karisito ka sokumuni vakavinaka yani i vale.