Mga Lugar mula sa mga Banal na Kasulatan

Getsemani

Alamin pa ang tungkol sa lugar kung saan nagsimula ang mga pagdurusa ng Tagapagligtas para sa atin.

kakahuyan ng olibo

Saan Ito?

Sa dalisdis ng Bundok ng mga Olibo, sa silangan ng Jerusalem.

mapa ng sinaunang Jerusalem

Paglalarawan sa mapa ng Jerusalem ni Jim Madsen

Ano ang Naroon?

Isang kakahuyan ng mga punong olibo at marahil ay isang pisaan para sa pagkuha ng langis mula sa mga olibo.

pisaan ng mga olibo

Ano ang Nangyari Dito?

Pagkatapos ng Huling Hapunan, pumunta si Jesucristo sa Getsemani kasama ang labing-isa sa Kanyang mga Apostol. Pagkatapos ay humiwalay Siya upang manalangin at isinama sina Pedro, Santiago, at Juan.

“Nagsimula siyang malungkot at mabagabag.” Sinabi niya, “Ako’y lubhang nalulungkot, hanggang sa kamatayan” (Marcos 14:33–34).

Nanalangin Siya, “Ama, kung ibig mo, ilayo mo sa akin ang kopang ito; gayunma’y huwag ang kalooban ko ang mangyari kundi ang sa iyo.

“Nagpakita sa kanya ang isang anghel na mula sa langit na nagpalakas sa kanya.

“Sa kanyang matinding paghihirap ay nanalangin siya ng higit na taimtim, at ang kanyang pawis ay naging gaya ng malalaking patak ng dugo na tumutulo sa lupa” (Lucas 22:42–44).

Matapos ang matinding pagdurusang ito ng Tagapagligtas, Siya ay ipinagkanulo ni Judas at dinakip ng mga pinunong Judio at isang pangkat ng mga kawal na Romano.

Alam Ba Ninyo?

Ang halamanang ito sa Bundok ng mga Olibo ay isang lugar kung saan madalas magpunta si Jesus (tingnan sa Lucas 22:39; Juan 18:2).

“Sa Aramaic, ang ibig sabihin ng salitang getsemani ay ‘pisaan ng olibo.’”¹

Sa unang pagpisa sa mga olibo sa pisaan, ang langis na dumadaloy ay pula, tulad ng dugo.

Noong panahon ng Tagapagligtas, ang pagkuha ng langis ng olibo ay dumadaan sa proseso kung saan padiiin nang padiin ang pagpisa hanggang sa mapiga ang lahat ng langis na makakatas dito:

1. Pagulungan ng malaking bato ang mga olibo.

2. Ilagay ang napisang mga olibo sa malalambot na hinabing basket, na pinagpatung-patong.

3. Daganan ng malaking kahoy o troso ang patung-patong na basket.

4. Patungan ng mga bato ang isang dulo ng malaking kahoy.²

Ang langis ng olibo ay ginamit noong unang panahon para sa langis ng lampara, mantikang panluto, pagkain, sabon, seremonyang pangrelihiyon, at pamahid para sa paggamot ng mga sugat.

Maraming taon bago ang pagparito ni Cristo, sinabi ng isang anghel kay Haring Benjamin ang tungkol sa pagdurusa ni Cristo sa Getsemani, sinasabing, “Ang dugo ay lumalabas sa bawat butas ng kanyang balat, napakasidhi ng kanyang magiging pagdurusa” (Mosias 3:7).

Kabilang sa pagdurusa ng Tagapagligtas para sa atin ang Kanyang pagdurusa sa Getsemani at sa krus, kung saan Siya namatay. Inako Niya ang lahat ng ating mga kasalanan, pasakit, paghihirap, tukso, karamdaman, at kahinaan (tingnan sa Alma 7:11–12).

si Jesucristo sa Getsemani

Gethsemane [Getsemani], ni Michael Malm

Alalahanin ang Getsemani

“Tandaan, tulad ng laman ng olibo, na pinipiga para sa langis na nagbigay ng liwanag, gayon din ang Tagapagligtas ay piniga. Mula sa bawat butas ng Kanyang balat ay lumabas ang dugo ng ating Manunubos na nagbibigay ng buhay. … Kapag umaapaw ang inyong kopa ng biyaya, alalahanin na ang Kanyang kopa ng kapaitan ang naging dahilan kaya naging posible ito. At kapag may mga pagsubok kayo, alalahanin ang Getsemani.”

Pangulong Russell M. Nelson, “Why This Holy Land?” Ensign, Dis. 1989, 18.

Mga Tala

1. Gabay sa mga Banal na Kasulatan, “Getsemani.”

2. Tingnan sa D. Todd Christofferson, pangkalahatang kumperensya ng Okt. 2016 (Liahona, Nob. 2016, 50).