Ang Susunod na Level

Ni David A. Edwards

Mga Magasin ng Simbahan

Gusto mo bang mas matuto sa iyong pag-aaral ng ebanghelyo? Subukan ang tip na ito.

Larawang-guhit ni Emily Jones

Sa video gaming, “nagle-level up” ka kapag natapos mo ang isang level ng isang laro at gagawin mo na ang kasunod. Magdudulot ito sa iyo ng pakiramdam na nagtagumpay ka. Kaya isipin mo na lang kung gaano kasaya ang makarating sa susunod na level sa isang bagay na mas mahalaga—tulad ng pag-unawa mo sa ebanghelyo.

Narito ang isang tip na tutulong sa iyo na “mag-level up” sa iyong pag-aaral ng ebanghelyo.

Ang Kapangyarihan ng mga Simpleng Simbolo

Habang binabasa mo ang mga banal na kasulatan at pinag-iisipan ang mga espirituwal na bagay, ang isang paraan para mas tumaas ang level ay maghanap ng mga simbolo.

Ang mga simbolo ay mga simpleng bagay (mga larawan, kulay, bagay, kilos, galaw) na nagpapaalala sa atin ng iba pang mas kumplikadong mga bagay (mga ideya, turo, alituntunin). Tinutulungan tayo nitong makipag-ugnayan nang mabilis at mas matuto.

Ang mga simbolo ng ebanghelyo ay nariyan na sa simula pa lang. Sinabi ng Panginoon kay Adan, “Ang lahat ng bagay ay may kani-kanyang kahalintulad, at ang lahat ng bagay ay nilalang at nilikha upang magpatotoo sa akin” (Moises 6:63). Kaya, gumagamit ang Panginoon ng mga simbolo para tulungan tayong malaman ang tungkol sa Kanya at sa Kanyang ebanghelyo.

Narito ang isang halimbawa.

Mga Simbolo sa Sacrament

Sa sacrament, ang mga maytaglay ng priesthood ay naghahanda ng tinapay at tubig. Pinagpuputul-putol ng iba pang mga maytaglay ng priesthood ang tinapay, sila ay lumuluhod, at nagdarasal. Ang tinapay at tubig ay dinadala sa mga tao upang kainin at inumin.

• Ang pagluhod para manalangin ay nagpapakita ng pagpapakumbaba at nagpapaalala sa atin ng ating mga tipan sa Diyos (tingnan sa Doktrina at mga Tipan 88:131).

• Ang tinapay ay nagpapaalala sa atin ng katawan ni Jesucristo. Ang katotohanan na ang tinapay ay pinagputul-putol ay nagpapaalala sa atin ng Kanyang pisikal na pagdurusa at kamatayan. Ang pag-alaala sa Kanyang katawan ay tumutulong din sa atin na maalala na Siya ay nabuhay na mag-uli upang ang lahat ng tao ay mabuhay na mag-uli.

• Ipinapaalala sa atin ng tubig ang dugong ibinuhos ni Jesucristo para sa atin nang magdusa Siya para sa ating mga kasalanan. Ang pag-alaala sa Kanyang pagdurusa ay tumutulong sa atin na maalala na sa pamamagitan ng biyaya ni Jesucristo, maaari tayong magsisi at mapatawad sa ating mga kasalanan.

• Ang pagkain at pag-inom ay paraan kung paano natin inaalagaan ang ating katawan. Kapag kumakain tayo ng tinapay at umiinom ng tubig sa sacrament, ipinapaalala sa atin na si Jesucristo ang pinagmumulan ng espirituwal na pangangalaga.

(Para sa karagdagang impormasyon, tingnan sa Mga Paksa ng Ebanghelyo, “Sacrament,” https://www.churchofjesuschrist.org/study/manual/gospel-topics/sacrament?lang=tgl.)

Maghanap ng mga Simbolo

Habang pinag-aaralan mo ang ebanghelyo, makakahanap ka ng mga simbolo na tutulong sa iyo na matuto. Narito ang ilang paraan na mas madali mo itong makikita at mauunawaan.

• Maghanap ng mga kuwento, talinghaga, panaginip, at pangitain. Ang mga ito ay kadalasang kinapapalooban ng mga simbolo.

• Tingnan kung ang mga simbolo ay ipinaliwanag sa mga banal na kasulatan. Ipinaliwanag ng Tagapagligtas ang Kanyang talinghaga tungkol sa manghahasik. Nakatanggap si Nephi ng pangitain na ipinapaliwanag ang panaginip ng kanyang ama tungkol sa punungkahoy ng buhay. Maaari ka ring makahanap ng paliwanag sa Gabay sa mga Banal na Kasulatan (https://www.churchofjesuschrist.org/study/scriptures/gs?lang=tgl)

• Maghanap ng mga larawan, bagay, o kilos. Kung may mga larawan, bagay, o kilos na pinakamahalaga sa isang bagay (tulad ng tinapay at tubig sa sacrament o paglulubog sa tubig sa binyag), pag-isipan kung ano ang mga bagay na iyon, ano ang ginagawa niyon, paano ginagamit, at ano ang kahalintulad ng mga ito, at iba pa. Maaaring humantong iyan sa ilang karagdagang kaalaman.

• Pansinin kung lumabas ang mga bagay na iyon sa iba’t ibang lugar. Ang mga puno, tubig, tinapay, tupa, barko, paglalakbay—maraming bagay na makikita sa iba’t ibang lugar sa buong banal na kasulatan. Pansinin ang mga ito, at maaari kang makakita ng mas marami pang pagkakatulad.

Simula pa lamang ito. Kapag mas tumaas ang iyong level, maaari mong madama na ikaw ay “nagle-level up” sa iyong pag-aaral ng ebanghelyo. Mangyari pa, ang pinakamahalagang pagkatuto ay darating sa pamamagitan ng Espiritu Santo, na gagabay sa iyo at magpapatotoo sa iyo habang nag-uukol ka ng oras at pagsisikap sa mga espirituwal na bagay.