Ngaahi Puleʻanga ʻo e Nāunaú
Ngaahi Konga Fakamatala
ʻOku akoʻi ʻe he tokāteline kuo fakahā ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻa ia kuo fakafoki maí, ko e fānau kotoa pē ʻa e ʻOtuá—tukukehe pē ha ngaahi fakaʻatā makehe ʻoku fuʻu tokosiʻi ia ke fakakau heni—te nau iku ʻo maʻu ha taha ʻo e ngaahi nāunau ʻo e puleʻanga ʻe tolú, ʻo aʻu ki he siʻisiʻi taha “ʻoku mahulu ange ʻi he meʻa kotoa ʻoku faʻa mahinó” [Tokateline mo e Ngaahi Fuakava 76:89]. …
Ko ha tokāteline makehe mo ha ʻulungaanga ʻe taha ʻo e Siasi kuo fakafoki maí ko e ngaahi fekau mo e ngaahi fuakava kuo fakahā maí ʻoku nau foaki ki he fānau kotoa pē ʻa e ʻOtuá ʻa e faingamālie toputapu ʻo hono fakafeʻungaʻi kinautolu ki he tuʻunga māʻolunga taha ʻo e nāunaú ʻi he puleʻanga fakasilesitialé. Ko e ikuʻanga māʻolunga taha ko iá—ʻa e hākeakiʻi ʻi he puleʻanga fakasilesitialé—ko e tefitoʻi taumuʻa ia ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. …
… ʻI he nāunau “fakasilesitialé” ʻoku ʻi ai ha ngaahi tuʻunga ʻe tolu, ʻa ia ko e māʻolunga taha aí ko e hākeakiʻi ʻi he puleʻanga fakasilesitialé. …
ʻOku fiemaʻu ʻe he palani ʻa e ʻOtuá, ʻa ia ʻoku fakavaʻe ʻi he moʻoni taʻengatá, ke lava ʻo toki maʻu pē ʻa e hākeakiʻí ʻi he faivelenga kakato ki he ngaahi fuakava ʻo ha mali taʻengata ʻi he vahaʻa ʻo ha tangata mo ha fefine ʻi he temipale māʻoniʻoní, ʻa ia ko ha nofo-mali ʻe iku ʻo ʻatā kiate kinautolu kotoa pē ʻoku faivelengá. …
Ko e Fakamaau Fakaʻosí ʻoku ʻikai ko hano fakafuofuaʻi pē ʻo hono fakakātoa ʻo ʻetau ngaahi ngāue leleí mo e ngāue koví—ʻi he meʻa kuo tau fakahokó. ʻOku makatuʻunga ia ʻi he ola aofangatuku ʻo ʻetau ngāué mo e fakakaukaú—ʻi he meʻa kuo tau aʻusiá. ʻOku tau feʻunga mo e moʻui taʻengatá ʻo fakafou ʻi ha founga ʻo e ului. …
Ko e taimi te tau fai ai ha fehalaaki ʻi he moʻui ní, te tau lava ʻo fakatomala pea foki ki he hala ʻo e fuakavá ʻa ia ʻoku fakatau ki he tuʻunga ʻoku finangalo ʻa e Tamai Hēvaní ke tau aʻusiá, tuʻunga ʻia Sīsū Kalaisi mo ʻEne Fakaleleí.