Kātakiʻi ʻa e ʻAhó ʻia Kalaisi
Ngaahi Konga Fakamatala
Kuó u ako mei he aʻusia fakafoʻituituí ʻoku ʻikai ngata pē ʻi he mahuʻinga ke mateuteu fakalaumālie ki he hāʻele mai ʻa e ʻEikí ka ko e founga pē ia ʻe taha ke maʻu ai ʻa e nongá mo e fiefia moʻoní.
ʻI ha ʻaho tokamālie ʻi he faʻahitaʻu fakatōlaú naʻá ku fuofua fanongo ai ki he kupuʻi lea “ʻOkú ke puke ʻi he kanisaá.” …
Kapau te u mate, ʻe fakafiemālieʻi, fakamālohia pea toe fakataha hoku fāmilí ʻi ha ʻaho, tuʻunga ʻia Sīsū Kalaisi mo ʻEne ongoongolelei kuo fakafoki maí. Kapau te u moʻui, te u lava ʻo maʻu ʻa e mālohi maʻongoʻonga taha ʻi he māmaní ke tokoniʻi, poupouʻi pea mo fakamoʻui au. ʻI he ngataʻangá, ʻe lava ke lelei ʻa e meʻa kotoa pē tuʻunga ʻia Sīsū Kalaisi. …
ʻOku ʻai ʻe Sīsū Kalaisi ke tau malava ʻo “kātakiʻi ʻa e ʻahó.” ʻOku ʻikai ʻuhinga ʻa e kātekina ʻo e ʻahó ke tānaki atu ki ha lisi ʻoku fakautuutu ai ʻa e ngaahi ngāue ke faí. Fakakaukau ki ha sioʻata fakaʻata lahi. ʻOku ʻikai ko hono tefitoʻi taumuʻá pē ke ʻai ke ʻasi lahi ange ʻa e ngaahi meʻá. ʻOkú ne lava foki ʻo fakatahatahaʻi mo huluʻi ʻa e māmá ke toe mālohi ange. ʻOku fiemaʻu ke tau fakafaingofuaʻi, tokanga taha ki heʻetau ngāué, pea hoko ko e kau tānaki ʻo e Maama ʻo Sīsū Kalaisí. ʻOku tau fiemaʻu ha ngaahi aʻusia mo ha fakahā ʻoku māʻoniʻoni ange.
Ko e moʻui taʻengatá ko e fiefia taʻengata. Ko e fiefia ʻi he moʻuí ni, ʻi he taimi ní—ʻo ʻikai koeʻuhí ko e ngaahi faingataʻa ʻo hotau kuongá ka koeʻuhí ko e tokoni ʻa e ʻEikí ke tau ako mei ai pea iku ai pē ʻo ikunaʻi kinautolú—pea mo e fiefia taʻe-hano-tatau ʻi he moʻui ka hoko maí. ʻE mole ʻʻa e ngaahi loʻimatá, ʻe fakaleleiʻi ʻa e ngaahi loto kuo kafó, ko e meʻa ʻoku molé ʻe ʻilo ia, ʻe fakanonga ʻa e ngaahi loto-hohaʻá, ʻe toe fakataha ʻa e ngaahi fāmilí, pea ko e meʻa kotoa pē ʻoku ʻa e Tamaí ʻe ʻatautolu ia.