ʻAʻeva ʻi ha Vā Fetuʻutaki Fakafuakava mo Kalaisi
Ngaahi Konga Fakamatala
ʻE tali fakataautaha ʻe he ʻEikí kitautolu ʻi hotau ʻaho ʻo e faingataʻá kapau te tau fili ke haʻi ʻetau moʻuí ki Heʻene moʻuí. Kuó Ne talaʻofa ke fononga mo kitautolu ʻi he halá.
ʻE lava ke tau ui ʻeni ko e ʻaʻeva ʻi he hala ʻo e fuakavá—ko ha hala ʻoku kamata ʻaki ʻa e fuakava ʻo e papitaisó pea iku ki he ngaahi fuakava mafatukituki ange ʻoku tau fakahoko ʻi he temipalé. … Ko e fuakavá ʻoku ʻikai fekauʻaki pē ia mo ha aleapau, neongo ʻoku mahuʻinga ia. ʻOku fekauʻaki ia mo ha vā fetuʻutaki. …
Ko Hono misioná ko e misiona ʻo e afeitaulalo. ʻE fakafetaulaki mai ʻa Sīsū Kalaisi ʻi he feituʻu mo e tuʻunga ʻoku tau ʻi aí. Ko e ʻuhinga ʻeni ʻo e ngoué, kolosí, mo e fonualotó. Naʻe fekauʻi mai ʻa e Fakamoʻuí ke tokoni ke tau ikunaʻi. Ka he ʻikai ke ʻomai ʻa e fakatauʻatāina ia ʻoku tau kumiá ʻe he nofo pē ʻi hotau tuʻunga lolotongá. … Ko Hono misioná foki ko ha misiona ʻo e fakalakalaká. Te Ne ngāue ʻiate kitautolu ke hiki hake kitautolu ki he tuʻunga ʻokú Ne ʻi aí, pea ʻi hono fakahoko iá, ʻoku ʻai ai kitautolu ke tau malava ʻo tatau mo Ia. Naʻe hāʻele mai ʻa Sīsū Kalaisi ke hiki hake kitautolu. ʻOkú Ne finangalo ke tokoniʻi kitautolu ke tau aʻusia ia. Ko e ʻuhinga ʻeni ʻo e temipalé. Kuo pau ke tau manatuʻi: ʻoku ʻikai ko e halafonongá pē te ne hākeakiʻi kitautolú; ko e kaungā-ngāué—ko hotau Fakamoʻuí. Pea ko e ʻuhinga ʻeni ʻo e vā fetuʻutaki ʻi he fuakavá. …
… Kamata ʻi he tuʻunga ʻoku mou ʻi aí. ʻOua naʻa tuku ke taʻofi koe ho tūkungá. Manatuʻi, ko e vavé pe tuʻunga ʻi he halá ʻoku ʻikai mahuʻinga tatau ia mo e fakalakalaká. …
Mālō, ʻoku tau fononga fakataha ʻi he halá ni, mo kole fakalotolahi ʻi he fonongá. ʻI heʻetau vahevahe ʻetau aʻusia fakatāutahá mo Kalaisí, te tau fakamālohia ai ʻa e līʻoa fakafoʻituituí.