ʻAʻeva ʻi he Hala ʻo Honau Fatongiá
Ngaahi Konga Fakamatala
ʻOku ou houngaʻia ʻi ha kāingalotu ʻo e Siasí ʻe lauimiliona ʻoku nau omi ʻi he ʻahó ni ki he Fakamoʻuí pea [vilitaki] atu ki muʻa ʻi he hala ʻo e fuakavá. … ʻOku hoko hoʻomou tui mālohi ki he Tamai Hēvaní pea mo e ʻEiki ko Sīsū Kalaisí pea mo hoʻomou moʻui totonu mo fakatapuí ke ne fakalotoa au ke u hoko ko ha tangata mo ha ākonga lelei ange.
ʻOku ou ʻofa ʻiate kimoutolu. ʻOku ou tanganeʻia ʻiate kimoutolu. ʻOku ou fakamālō atu. Pea ʻoku ou fakahīkihikiʻi kimoutolu.
ʻOku fakamatalaʻi lelei taha ʻe ha konga lea naʻe fai ʻe Samuela ko e tangata Leimana ʻi he Tohi ʻa Molomoná, ʻa ʻeku ngaahi ongo kiate kimoutolú.
“Vakai ko e tokolahi ange ʻo kinautolu ʻoku nau ʻaʻeva ʻi he hala ʻo honau fatongiá … pea ʻoku nau ngāue tūkuingata taʻetuku ke nau fakatafoki hono toe ʻo honau kāingá ki he ʻiloʻi ʻo e moʻoní” [Hilamani 15:5–6; naʻe tānaki atu hono fakamamafaʻí]. …
ʻOku mou ʻofa mo tokoni, fakafanongo mo ako, tauhi mo fakafiemālie, pea akoʻi mo fakamoʻoni ʻaki ʻi he mālohi ʻo e Laumālie Māʻoniʻoní. ʻOku mou faʻa ʻaukai mo lotu, pea fakaʻau ʻo mālohi ange ʻi hoʻomou loto-fakatōkilaló, pea tuʻu mālohi ange ʻi he tui kia Kalaisí, “ʻo aʻu ki hono fakafonu [homou] laumālié ʻaki ʻa e fiefia mo e fiemālie, ʻio, ʻo aʻu ki hono fakahaohaoaʻi mo fakamāʻoniʻoniʻi [homou] lotó, ʻa ia ko ha fakamāʻoniʻoniʻi ʻoku hoko tupu mei [hoʻomou] fakavaivaiʻi ʻa [homou] lotó ki he ʻOtuá” [Hilamani 3:35].
… Ko kimoutolu ʻoku mou [vilitaki] atu ki muʻa ʻi he ʻahó ni ʻi he ʻaʻeva ʻi he hala ʻo homou fatongiá, ʻoku mou hoko ko e mālohinga ʻo e Siasi ʻo e Fakamoʻuí kuo fakafoki maí. Pea hangē ko ia kuo talaʻofa mai ʻe he ʻEikí, “ʻe fakahā ʻa e ngaahi taloni mo e ngaahi puleʻanga, mo e ngaahi pule fakapilinisi mo e ngaahi mālohi kotoa pē, pea fokotuʻu atu ia kiate kinautolu kotoa pē kuo nau kātaki ʻi he loto-toʻa koeʻuhí ko e ongoongolelei ʻa Sīsū Kalaisí” [Tokāteline mo e Ngaahi Fuakava 121:29].