ʻOku Mau Fakamālō
Ngaahi Konga Fakamatala
Siʻoku kāinga ʻofeina, ko ʻeku fakamoʻoni kiate kimoutolu ʻi he pongipongi ní ko ʻetau mohu tāpuaki ke ʻiloʻi ʻa e meʻa kotoa ʻoku tau ʻiló koeʻuhí ko ʻetau maʻu ʻa Siosefa Sāmita, ko e palōfita ʻo e kuonga fakakosipeli fakaʻosi ko ʻení.
ʻOku mahino kiate kitautolu ʻa e taumuʻa ʻo e moʻuí, pea ko hai kitautolu.
ʻOku tau ʻiloʻi ko hai ʻa e ʻOtuá; ko hai ʻa e Fakamoʻuí; koeʻuhí he ʻoku tau maʻu ʻa Siosefa, ʻa ia naʻe ʻalu ki ha vaoʻakau ʻi heʻene kei siʻí ʻo kumi ha fakamolemole ki heʻene ngaahi angahalá.
ʻOku ou tui ko e taha ia ʻo e meʻa nāunauʻia mo fakaofo taha ʻe lava ke ʻilo ʻe ha taha ʻi māmani—naʻe fakahā ʻe heʻetau Tamai Hēvaní mo e ʻEiki ko Sīsū Kalaisí Kinaua, ʻi he ngaahi ʻaho kimui ní pea naʻe fokotuʻu hake ʻa Siosefa ke ne fakafoki mai ʻa e kakato ʻo e ongoongolelei taʻengata ʻa Sīsū Kalaisí.
ʻOku tau maʻu ʻa e Tohi ʻa Molomoná. Ko ha meʻaʻofa fakaofo mo fakaʻofoʻofa ʻa e Tohi ʻa Molomoná ki he kāingalotu ʻo e Siasí. Ko ha fakamoʻoni ia ʻe taha, ko ha toe fakamoʻoni ʻe taha ko Sīsū ʻa e Kalaisí. ʻOku tau maʻu iá koeʻuhí he naʻe taau ʻa Siosefa ke ne maʻu ʻa e ʻū lauʻi peletí, naʻe tataki fakalangi ia ke ne liliu kinautolu ʻaki ʻa e meʻafoaki mo e mālohi ʻo e ʻOtuá pea ke ʻoatu ʻa e tohí ki māmaní. …
… ʻOku tau ʻi he tuʻunga ʻo e feinga ke teuteuʻi kitautolu, ʻi he ʻaho takitaha, ke toe kiʻi lelei ange, kiʻi angaʻofa ange, kiʻi mateuteu ange ki he ʻaho ko iá, ʻa ia kuo pau ke hoko mai, te tau toe foki ai ki he ʻao ʻo ʻetau Tamai Hēvaní pea mo e ʻEiki ko Sīsū Kalaisí.