ʻE Lahi Pehē Fau ʻa Hoʻomou Fiefiá
Ngaahi Konga Fakamatala
ʻOku ou lea ʻi he ʻahó ni ki he kakai matuʻotuʻa taukei tokolahi ʻi he Siasí te nau lava ʻo ō ʻo ngāue fakafaifekaú. ʻOku fiemaʻu kimoutolu ʻe he ʻEikí. …
ʻI heʻeku ʻaʻahi ki he ngaahi misiona ʻi he funga ʻo e māmaní, kuó u mamata ai ki he ngāue maʻongoʻonga ʻa ʻetau kau faifekau matuʻotuʻá. ʻOku mahino ʻoku nau fiefia ʻi hono fakahoko ʻa e “finangalo ʻo e ʻEikí” pea mo hono fai “ʻa e meʻa ʻa e ʻEikí.” [Tokāteline mo e Ngaahi Fuakava 64:29]. …
Kuó u ui ha ngaahi hoa mali tokolahi ke ngāue peá u sio ki he hā mei honau fofongá ʻa e Maama ʻo Kalaisí. ʻI heʻenau fokí, ʻoku nau fakamatalaʻi ʻa ʻenau ofi ange ki he ʻEikí mo ʻenau vāofi angé, ongoʻi hono lilingi hifo ʻa e Laumālie ʻo e ʻEikí kiate kinautolú, mo ʻiloʻi ʻoku nau fakatupu ha ola lelei. Ko hai he ʻikai ke ne fiemaʻu ia?
ʻI heʻeku hoko ko ha ʻAposetolo ʻa e ʻEiki ko Sīsū Kalaisí, ʻoku ou kole atu ke mou ʻalu ʻo ngāue fakafaifekau ʻi hono tānaki ʻo ʻIsilelí pea mahalo te ke toe ngāue pē. …
ʻOku ou palōmesi atu ʻi hoʻo ngāué, te ke ongoʻi ʻa e ʻofa ʻa e ʻEikí ʻi hoʻo moʻuí, te ke ʻiloʻi Ia, te Ne ʻafioʻi koe, pea ʻe “lahi pehē fau ʻa hoʻomou fiefiá” [Tokāteline mo e Ngaahi Fuakava 18:15]. ʻE tataki fakalaumālie mo tāpuekina ho fāmilí, ho makapuná, mo ho makapuna uá, ʻi hoʻo ngāue tokoni fai mateakí. “[ʻE] tupulekina ʻa e melinó mo e ʻofá” [Sute 1:2] ʻi heʻenau moʻuí ʻi he ngaahi taʻu ka hokó.