Vahehongofulú: Ko Hono Fakaava e Ngaahi Matapā ʻo e Langí
Ngaahi Konga Fakamatala
ʻOku mei he ʻOtuá ʻa e meʻa kotoa pē ʻoku tau maʻú mo e tuʻunga ʻoku tau ʻi aí. ʻI heʻetau hoko ko e kau ākonga ʻa Kalaisí, ʻoku tau loto-fiemālie ke vahevahe mo kinautolu ʻoku tau feohí.
Kuo kole mai ʻe he ʻEikí ke tau fakafoki ange kiate Ia mo Hono puleʻanga ʻi māmaní ʻa e pēseti ʻe 10 ʻo ʻetau tupú. Kuó Ne talaʻofa mai kiate kitautolu ko e taimi ko ia ʻoku tau totongi totonu ai ʻetau vahehongofulú, te Ne “fakaava … ʻa e ngaahi matapā ʻo e langí, pea lilingi hifo … ha tāpuaki, he ʻikai ha feituʻu ʻe faʻa hao ia ki ai” [Malakai 3:10]. Kuó Ne talaʻofa mai te Ne maluʻi kitautolu mei he koví. …
ʻOku lahi ʻa e ngaahi founga ʻoku fakaava ai ʻa e ngaahi matapā ʻo e langí. ʻOku fakatuʻasino ha niʻihi, ka ko e lahi tahá ʻoku fakalaumālie. Ko ha niʻihi ʻoku pelepelengesi mo faingofua ʻo ʻikai faʻa fakatokangaʻi. Falala ki he taimi ʻa e ʻEikí; ʻoku hoko mai maʻu pē ʻa e ngaahi tāpuakí. …
… ʻOku fakaʻuhingaʻi ʻe māmani ʻa e vahehongofulú ki heʻetau paʻangá, ka ko e fono toputapu ʻo e vahehongofulú ʻoku fakatefito pē ʻi heʻetau tuí. Ko ha founga ʻe taha hono fakahaaʻi ʻetau loto-fiemālie ke fakamuʻomuʻa ʻa e ʻEikí ʻi heʻetau moʻuí, ʻo laka ange ʻi ha toe meʻa ʻoku tau saiʻia mo manako aí, ko hono totongi totonu ʻetau vahehongofulú. ʻOku ou palōmesi atu ʻi hoʻo falala ki he ʻEikí, ʻe muimui mai ai ʻa e ngaahi tāpuaki ʻo e langí. …
Ko e mahutafea ʻa e ʻEikí ʻoku fakafou mai ia ʻi hoʻo vahehongofulu angaʻofá ʻa iakuó ne fakamālohia ʻa e paʻanga talifaki ʻa e Siasí, ʻo maʻu ai ʻa e ngaahi faingamālie ke fakatupulaki ʻa e ngāue ʻa e ʻEikí ʻo mahulu atu ʻi ha meʻa pē kuo tau aʻusia. ʻOku ʻafioʻi kotoa ia ʻe he ʻEikí, pea ʻe ʻi ai ʻa e taimi, te tau mamata ai ki hono fakahoko kotoa ʻEne ngaahi taumuʻa toputapú.