Ko e Foha Maumau Koloá mo e Hala ʻOku Fakatau ki ʻApí
Ngaahi Konga Fakamatala
Ko e Foki ʻa e Foha Maumau Koloá, tā ʻe Richard Burde
Ko hai ia ʻiate kitautolu kuo teʻeki mavahe mei he hala ʻo e māʻoniʻoní, ʻo fakakaukau taʻe-fakapotopoto te tau lava ʻo maʻu ha fiefia lahi ange ʻi he fononga ʻi hotau hala siokitá?
Ko hai ia ʻiate kitautolu kuo teʻeki ke ne ongoʻi loto-fakatōkilalo, loto-mamahi, mo holiholivale ke maʻu ha fakamolemole mo ha ʻaloʻofá?
Mahalo ʻe fifili ha niʻihi, “ʻOku malava nai ke u toe foki? ʻE lumaʻi, fakasītuʻaʻi, mo liʻaki au ʻo taʻengata ʻe hoku ngaahi kaungāmeʻa kimuʻá? ʻE lelei ange nai ke u hē ai pē au? ʻE fēfē nai ʻa e tali ʻa e ʻOtuá kapau te u feinga ke foki?”
ʻOku ʻomi ʻe he talanoa fakatātā [ʻo e foha maumau koloá] ʻa e talí kiate kitautolu.
ʻE hāʻele mai ʻetau Tamai Hēvaní kiate kitautolu, ʻoku fonu Hono lotó ʻi he ʻofa mo e manavaʻofa. …
ʻE fiefia ʻa e langí ʻi heʻetau fokí. …
Neongo kapau kuo taki koe ʻe hoʻo ngaahi filí ke ke mamaʻo mei he Fakamoʻuí mo Hono Siasí, ka ʻoku tuʻu ʻa e ʻEiki Faifakamoʻuí ʻi he hala ʻoku fakatau ki ʻapí, ʻo talitali lelei koe. Pea ʻi heʻemau hoko ko e kāingalotu ʻo e Siasi ʻo Sīsū Kalaisí ʻoku mau feinga ke muimui ki Heʻene sīpingá mo talitali lelei [kimoutolu] ko homau ngaahi tokoua mo e tuofāfine, ko homau ngaahi kaungāmeʻa. ʻOku mau fiefia mo kātoanga fiefia mo [kimoutolu]. …
ʻOku ʻikai ke u fakangalingali ʻoku faingofua ʻa e foki maí. ʻOku ou lava ʻo fakamoʻoniʻi ia. Ko hono moʻoní, mahalo ko e fili faingataʻa taha ia te ke ala fakahokó.
Ka ʻoku ou fakamoʻoni ko e momeniti te ke fili ai ke foki mo fononga ʻi he hala ʻo hotau Fakamoʻuí mo e Huhuʻí, te ke maʻu Hono mālohí ʻi hoʻo moʻuí pea liliu ai.