Ko Hotau Takaua Maʻu Pē
Ngaahi Konga Fakamatala
Ko e Toko Tahá Pē, tā ʻe Malory Fiso
ʻOku tau fiemaʻu, pea te ke fiemaʻu, ʻa e takaua maʻu pē ʻo e Laumālie Māʻoniʻoní. ʻOku tau fakaʻamu ki ai ʻi he taimí ni, ka ʻoku tau ʻilo mei he aʻusiá ʻoku ʻikai faingofua ke fakahoko ia. ʻOku tau takitaha fakakaukau, lea ʻaki, mo fai ʻa e ngaahi meʻa ʻi heʻetau moʻui fakaʻahó te ne lava ʻo tuli ʻa e Laumālié.
ʻI heʻene hoko iá, ʻe lava ke tau ongoʻi ʻoku ʻikai hōifua mai ʻa e ʻEikí. Pea ʻe ala ʻahiʻahiʻi kitautolu ke tau ongoʻi tuenoa. …
Kapau ʻoku faingataʻa ke ke ongoʻi ʻa e Laumālie Māʻoniʻoní, ʻe lava ke ke fakakaukauloto pe ʻoku ʻi ai nai ha meʻa ʻoku fiemaʻu ke ke fakatomalaʻi pea ke maʻu ha fakamolemole. Te ke lava ʻo lotua ʻi he tui ke ʻilo ʻa e meʻa ke fai ke fakamaʻa ai koé peá ke taau ange ai mo e takaua maʻu pē ʻa e Laumālie Māʻoniʻoní.
Kapau ʻokú ke fiemaʻu ʻa e takaua ʻa e Laumālie Māʻoniʻoní, kuo pau ke ke fiemaʻu ia ki he ngaahi ʻuhinga totonu. Kuo pau ke tatau hoʻo ngaahi taumuʻá mo e ngaahi taumuʻa ʻa e ʻEikí. Kapau ʻoku fuʻu siokita hoʻo ngaahi taumuʻá, ʻe faingataʻa ke ke maʻu ʻa e ngaahi ueʻi ʻa e Laumālié.
Ko e tefitoʻi foungá ke ta fiemaʻu ʻa e meʻa ʻoku finangalo ki ai ʻa e Fakamoʻuí. ʻOku fiemaʻu ke tākiekina ʻetau ngaahi taumuʻá ʻe he ʻofa haohaoa ʻa Kalaisí. …
… ʻOku fekauʻi mai ʻa e Laumālie Māʻoniʻoní ki he kāingalotu fuakava faivelenga ʻo e Siasi ʻo Sīsū Kalaisí. ʻE makehe ʻi he taimí ni hoʻo ngaahi aʻusiá, pea ʻe tataki koe ʻe he Laumālié ʻi he founga lelei taha ʻe feʻunga mo hoʻo tuí pea mo hoʻo malava ko ia ke maʻu ha fakahā maʻau mo kinautolu ʻokú ke ʻofa ai mo tokoniʻí. ʻOku ou lotua ʻaki hoku lotó kotoa ʻe tupulaki hoʻomou loto-falalá.